દુર્ઘટના:શાકભાજી વેચી પરત ફરતા વાવડીના શખ્સનું કરૂણ મોત

વાવડી ખાતે રહેતા યુવક બાબરા ખાતે શાકભાજીનો વેપાર કરી તેની છકડો રીક્ષા લઇ ઘરે પરત આવતા હતા ત્યારે સામેથી આવતા છકડા રીક્ષાના ચાલકે તેમની રીક્ષા સાથે ધડાકાભેર અથડાવતા યુવકને માથાના ભાગે ગંભીર ઇજા થતા તેમનુ ઘટના સ્થળે જ મોત થયુ હતુ.

આ અંગે મળતી વિગત મુજબ ગઢડાના વાવડી ખાતે રહેતા છગનભાઇ કાબાભાઇ ઝાપડીયા (ઉ.વ.48) શાકભાજી તેમની રીક્ષા નં.GJ-04-AT-1092 લઇને બાબરા ખાતે શાકભાજી વેચવા ગયેલ જ્યાથી પરત આવતા હતા તે દરમિયાન મોટી કુંડળથી નાની કુંડળ જવાના રસ્તે સામેથી પુરઝડપે આવી રહેલ રીક્ષા નં.GJ-14-X-0972ના ચાલક ગોપાલભાઇ દેવજીભાઇ સોરઠિયાએ છગનભાઇની રીક્ષા સાથે અથડાવતા છગનભાઇનસ રીક્ષા પલ્ટી ખાઇ ગયેલ અને તેઓ રીક્ષા નીચે આવી જતા માથાના ભાગે ગંભીર ઇજા થતા તેમનુ ઘટના સ્થળે મોત નિપજ્યુ છે. બનાવ અંગે મૃતકના કૌટુંબીક ભાઇએ અકસ્માત સર્જી રીક્ષા મુકી નાસી ગયેલ ગોપાલ સામે ગઢડા પોલીસમાં ફરિયાદ નોંધાવતા પોલીસે તપાસ હાથ ધરી છે.