હાલાકી:તળાજા-મહુવાના બિસ્માર માર્ગ પ્રશ્ને ધારાસભ્યની આંદોલનની ચિમકી

મહુવાથી તળાજા-મહુવા નેશનલ હાઇવે અતિ બિસ્માર બની ગયો છે જેથી વાહન ચાલકો ત્રાહિમામ પોકારી ગયા છે.આ પ્રશ્ને તજાના ધારાસભ્ય કનુભાઇ બારૈયાએ તાકીદે રીપેરીંગ કરવામાં નહીં આવે તો ઉપવાસ આંદોલનની ચિમકી આપી છે. બિસ્માર માર્ગ પ્રશ્ને અનેકવખત રજુઆત કરાયા છતા કોઇ ઉકેલ આવતો નથી.ભાવનગરથી સોમનાથનો નેશનલ હાઇવે બની રહયો છે.જેનું કામ ગોકળગતિએ ચાલી રહયું છે.આ કામની સમય મર્યાદા પણ પુરી થઇ ગઇ છે.હાલમાં જુનો માર્ગ પણ અત્યંત બિસ્માર થઇ ગયો છે. ભાવનગરથી તળાજા-મહુવા રોડ પર ભારે ટ્રાફીક રહે છે

.જેથી આ અતિ બિસ્માર રોડનું રીપેરીંગ તાત્કાલિક શરૂ કરવા ધારાસભ્ય બારૈયાએ નેશનલ હાઇવે ઓથોરીટી ઓફ ઇન્ડીયાના ચીફ મેનેજરને રજુઆત કરી છે.આ રોડના ઝડપી કામ અને જુના રોડના રીપેરીંગ બાબતે વિધાનસભામાં અને નેશનલ હાઇવે ઓથોરીટીને વારંવાર રજુઆતો કરાઇ છે છતાં કોઇ કાર્યવાહી થઇ નથી.રીપેરીંગ કામ તાત્કાલિક શરૂ કરવામાં નહીં આવે તો સમગ્ર વિસ્તારની જનતા રોડ પર ઉતરશે અને ગાંધી ચિંધ્યા માર્ગે ઉપવાસ આંદોલન સહિતના કાર્યક્રમો આપવામાં આવશે જેની સંપૂર્ણ જવાબદારી તંત્રની અને નેશનલ હાઇવે ઓથોરીટીની રહેશે તેવી ચિમકી ધારાસભ્ય કનુભાઇ બારૈયાએ ઉચ્ચારી છે.