વાતાવરણ:આગામી સપ્તાહમાં તાપમાન 40 ડિગ્રીને વટી જશે

ભાવનગર શહેરમાં આજે મહત્તમ તાપમાન 37.3 ડિગ્રી નોંધાયું હતુ પણ આગામી દિવસોમાં શહેરમાં હિટ વેવથી તાપમાન 40 ડિગ્રીને વટી જવાની શક્યતા હવામાન વિભાગે વ્યક્ત કરી છે ત્યારે ભાવનગર મહાનગરપાલિકાના આરોગ્ય વિભાગે જાહેર કરેલી માર્ગદર્શિકામાં જણાવ્યું છે કે ગરમીના વધારાના કારણે શરીરમાં લૂ લાગવા(સન સ્ટ્રોક)ના કેસો નોંધાતા હોય છે જેમાં સમયસરની સારવાર ન લેવામાં આવે તો જીવલેણ સાબિત થઇ શકે છે. તેમ મ્યુ. આરોગ્ય અધિકારી ડો.આર.કે.સિંહાએ જણાવ્યું છે.

ગરમીમાં આટલી બાબતો અચૂક યાદ રાખો
શક્ય હોય ત્યાં સુધી સખત તડકામાં નિકળવાનું ટાળવું
ઝાડનો છાંયો, બિલ્ડિંગની ઓથ, જેવી છાંયોની જગ્યાએ ચાલવું
માથા ઉપર ટોપી, પાઘડી, ગમછો, હેટ, કેપ વિ. પહેરવી
શરીરમાં ડિ-હાઇડ્રેશન ન થાય તે માટે વારંવાર પાણી પીવું
ગોળનું પાણી, લીંબુ પાણી, વરિયાળી, ગુલાબ વિ. શરબતમાં મીઠું નાખીને સેવન કરવું, સાકર ટેટી, તરબુચ, કાકડી વિ.નું સેવન કરવું.