કામગીરી:ચિત્રા થી આખલોલ સુધી 25 જેટલા દબાણો પર બુલડોઝર ફર્યું

કોર્પોરેશન દ્વારા ભાવનગર રાજકોટ રોડ પર સિક્સ લેન બનાવવાની કામગીરી ચાલી રહી છે જેમાં અડચણરૂપ ચિત્રા થી આખલોલ સુધી ૨૫ જેટલા દબાણો પર બુલડોઝર ફેરવવા આવ્યું હતું. ભાવનગર મહાનગરપાલિકા દ્વારા ફ્લાયઓવર અને સિક્સલેનની કામગીરી ઝડપી બનાવી છે. આરટીઓ સર્કલ થી રોડના કામોમાં અડચણકર્તા દબાણ હટાવવાની કામગીરી છેલ્લા ઘણા દિવસથી ચાલુ હતી. પરંતુ મુખ્યમંત્રીના કાર્યક્રમ અને પોલીસ બંદોબસ્તના અભાવે દબાણ હટાવવાની કામગીરીને બ્રેક લાગ્યો હતો.

આજે પુનઃ દબાણ હટાવવાનું શરૂ કરતાં ચિત્રા માર્કેટિંગ યાર્ડ સામેથી આખલોલ જકાતનાકા સુધી સિક્સ લેન બનાવવામાં અડચણરૂપ 25 જેટલા નાના-મોટા દબાણો પર બુલડોઝર ફેરવ્યું હતું. દબાણ હટાવવાની કામગીરી સમયે દબાણકર્તાઓ અને રાજકીય આગેવાનોએ પણ સ્થળ પર આક્રોશ ઠાલવ્યો હતો પરંતુ કોર્પોરેશન દ્વારા દબાણ હટાવવાની કામગીરી શરૂ રાખી હતી. રાજકીય અડચણને તંત્ર તાબે થયું ન હતું.