માર્ગદર્શન:ધો. 6 થી ધો.12ની છાત્રાઓને સ્વરક્ષણની તાલીમનો આરંભ, તાલીમ પૂરી કરનાર છાત્રાને સર્ટિફિકેટ અપાશે

કોરોનાને કારણે શાળાઓ બંધ હોવાથી શિક્ષણ વિભાગ દ્વારા શિક્ષણ માટે વિવિધ પ્રયાસો કરાઈ રહ્યા છે. જ્યારે 3 વર્ષથી વિદ્યાર્થીઓને સ્વરક્ષણની તાલીમ આપવાની શરૂઆત કરાઈ છે, જે હાલ શાળાઓ બંધ હોવાથી તાલીમ આપી શકાતી નથી. હવે એક નવતર પ્રયોગ તરીકે ધો.6થી ધો.12માં અભ્યાસ કરતી વિદ્યાર્થિનીઓને ઓનલાઇન સ્વરક્ષણની તાલીમનો આરંભ થયો છે.

અત્યારે જે પ્રકારે ઓનલાઇન શિક્ષણ અપાય છે તેમ ધોરણ 6 થી 12ની વિદ્યાર્થિનીઓને ઓનલાઇન સ્વરક્ષણની તાલીમ અપાશે. જેના માટે સમગ્ર શિક્ષા વીડિયો અભિયાન દ્વારા ઓનલાઇન સ્વરક્ષણ તાલીમ કોર્સ તૈયાર કરાયો છે. 22 ડિસેમ્બરથી 28 ફેબ્રુઆરી સુધી 8 સપ્તાહમાં 24 ભાગમાં તાલીમ અપાશે. અઠવાડિયામાં મંગળવાર, ગુરુવાર અને શનિવારે સ્વરક્ષણની તાલીમનો વીડિયો અપલોડ કરાશે. દરેક શાળામાં કોઈ પણ એક શિક્ષકને નોડલ શિક્ષક બનાવી તાલીમને લગતી તમામ જવાબદારી તેમને અપાશે. તાલીમ પૂરી કરનાર વિદ્યાર્થિનીઓને સર્ટિફિકેટ પણ અપાશે.