દુખદ:કોરોના સામે 10 દિવસ સુધી લડીને નિવૃત શિક્ષકનું નિધન, બીમારી નામશેષ થયાનું માની બેદરકાર ન બનશો

એક તરફ લોકો સરકારી આંકડાઓમાં કોરોનાથી મૃત્યુ ઝીરો જોવે છે અને બીજી તરફ પોતાના ઘર પાસે જ કોરોના કારણે અવસાન જોવે છે, તેવી ઘટનાઓને કારણે આરોગ્ય વિભાગ અને સરકારની આંકડાકીય માયાજાળ સામે અનેક પ્રશ્નો ઉદભવી રહ્યા છે. તેવી જ એક ઘટનામાં તળાજા રોડ ઉપરની શ્રીનાથજીનગર સોસાયટીમાં નિવૃત્ત શિક્ષક પ્રવિણભાઈ જોશીનું નિધન નીપજ્યું છે.

તેમના પુત્ર દેવાંગભાઈ જોશીએ જણાવ્યું કે,આમ તો મારા પિતાનું અવસાન એ તારીખે થયું છે કે તે દિવસે તો સમગ્ર ગુજરાતમાં એકપણ મૃત્યુ નહિ થયાનું સરકારી ધોરણે આંકડામાં બતાવવામાં આવ્યું છે.તેમની અનેક પ્રકારની માયાજાળ જેવું લાગે છે.છતાં અત્યારે જે બની ગયું છે, તેનાથી અમે આવાક છીએ.છતાં આવું ન થાય તે જરૂરી છે. સાચી વિગત આરોગ્ય વિભાગે બહાર આપવી જરૂરી છે લોકોમાં એવી પણ ચર્ચા ચાલી રહી છે કે, ચૂંટણી ટાણે કોરોનાના કેસ ઓછા બતાવાઈ રહ્યા છે. જ્યારે વાસ્તવિકતા કંઈક જુદી છે. આ પરિસ્થિતિમાં મહામારી વચ્ચે આરોગ્ય વિભાગ અને પ્રજાનો એકબીજા પ્રત્યેનો વિશ્વાસ જળવાઈ રહે તે અત્યંત આવશ્યક છે.