કાર્યવાહી:નિલમબાગ, મોખડાજી સર્કલ અને નિર્મળનગરમાં દબાણો દૂર કરાયા

ભાવનગર મહાનગરપાલિકાના એસ્ટેટ વિભાગની દબાણ હટાવ ટીમ દ્વારા આજે નિલમબાગ થી જ્વેલસ, શિવાજી સર્કલ થી મોખડાજી સર્કલ અને નિર્મળનગર ખાતે રસ્તા પર અડચણ કરતા લારી કેબીનો સહિતનું હટાવ્યું હતું. કોર્પોરેશનના પ્રજાના પ્રતિનિધિઓ ઘર ભેગા થતાં જ કોર્પોરેશનના અધિકારીઓ અસલ મૂડમાં આવ્યા હોય તેમ શહેરમાં જુદાજુદા સ્થળોએથી દબાણ હટાવવાની કામગીરી શરૂ કરી છે. જેમાં ગઈકાલે ભાવનગર રાજકોટ રોડ પરથી દબાણો હટાવ્યા બાદ આજે નીલમબાગ સર્કલ થી જ્વેલસ સર્કલ સુધી રસ્તાની બંને તરફ રાખેલી લારીઓ કેબીનો હટાવી હતી તેમજ શિવાજી સર્કલ થી મોખડાજી સર્કલ સુધી પણ રસ્તામાં અડચણ કરતા ગેરકાયદેસર લારી ગલ્લા દૂર કર્યા હતા.

જ્યારે નિર્મળનગર ખાતે પાવર હાઉસની પાસે કબાડી માર્કેટ પણ દૂર કરી હતી.ભાવનગર શહેરમાં મંજુર થયેલા અનેક રોડના કામો હાથ ધરવામાં આવ્યા છે ત્યારે રોડમાં અડચણકર્તા દબાણો હટાવવાની કોર્પો દ્વારા કામગીરી હાથ ધરાઇ છે. આગામી દિવસોમાં પોલીસ બંદોબસ્ત બાદ મોટુ ડિમોલેશન હાથ ધરાશે.