ચૂંટણી:રાજકીય પક્ષોની અવગણનાથી પ્રજાપતિ સમાજ ચૂંટણી લડશે, 15 હજારથી વધુ વસ્તીના સમાજની બેઠકમાં નિર્ણય

ભાવનગર મહાનગરપાલિકાની ચૂંટણીમાં પ્રજાપતિ સમાજે અપક્ષ ઉમેદવારી કરવા બાંયો ચડાવી છે, રાજકીય પક્ષો દ્વારા 15 હજારથી વધુ વસ્તી ધરાવતા પ્રજાપતિ સમાજની અવગણના કરવા સામે આજે 7 ગોળ પ્રજાપતિ સમાજ ના પ્રમુખ, આગેવાનો, કાર્યકર્તાઓ એક મંચ પર ભેગા થયા હતા અને અપક્ષ ઉમેદવારી કરવા નિર્ણય લેવાયો હતો.પ્રજાપતિ સમાજના અપક્ષ ઉમેદવારને જ સમાજ દ્વારા મત આપવા અન્યથા મતદાનનો બહિષ્કાર કરવાનો નિર્ણય લેવામાં આવ્યો હતો. આ બેઠકમાં કોર કમિટી પણ રચવામાં આવી હતી.

મહાનગરપાલિકાના 13વોર્ડમાં 52 બેઠક પૈકી એક પણ બેઠક પ્રજાપતિ સમાજને ફાળવવામાં નહીં આવતા સમસ્ત પ્રજાપતિ સમાજમાં રોષની લાગણી જન્મી છે, આ અંગે આજે ગોળ સમસ્ત પ્રજાપતિ સમાજની બેઠક મળી હતી, શહેરના વડવા બ, બોર તળાવ, કાળીયાબીડ સહિતના વોર્ડમાં પ્રજાપતિ સમાજની વસતી નોંધપાત્ર છે. તેમ છતાં રાજકીય પક્ષો દ્વારા પ્રજાપતિ સમાજને ટિકિટની ફાળવણી કરવામાં અન્યાય કરવામાં આવ્યો છે.

ભાવનગરના કાળીયાબીડ, લખુભા હોલ સામે મોનાર્ક ટાઇલ્સ ખાતે મળેલી બેઠકમાં સર્વ ગોળ પ્રજાપતિ સમાજના અગ્રણીઓએ એક સૂર વ્યક્ત કરીને મહાનગરપાલિકાની ચૂંટણીમાં અપક્ષ ઉમેદવારી નોંધાવવા સર્વાનુમતે નિર્ણય લીધો છે.આવી રીતે સમગ્ર સમાજની રાજકીય પક્ષો દ્વારા અવગણના કરાતા પ્રજાપતિ સમાજે સ્વબળે ચૂંટણી લડવાનો નિર્ણય કર્યો છે.