કાર્યવાહી:ભાવનગર અને બોટાદમાં દિવાળી દરમિયાન તોલમાપ ખાતાએ 23 એકમોને દંડ ફટકાર્યો, 2020-21 દરમિયાન નિયમ ભંગ બદલ 192 એકમો સામે કાર્યવાહી

ભાવનગર અને બોટાદ જિલ્લા તોલમાપ અને ગ્રાહક સુરક્ષા તંત્ર દ્વારા હાલમાં દિવાળીના તહેવારો દરમિયાન 435 જેટલા વિવિધ એકમોની ઓચિંતી મુલાકાત લઇને 23 એકમો સામે ક્ષતિઓ બદલ કાયદેસર કાર્યવાહી કરીને આ એકમો પાસેથી ગુન્હા માંડવાળ ફી પેટે રૂ.50 હજાર વસૂલ કરવામાં આવ્યાં તથા 278 એકમોની ચકાસણી કરી રૂ.4,27,530 ચકાસણી ફી તથા વિલંબિત અને અન્ય ફી સહિત કુલ રૂ.4,78,375ની ફી વસૂલી હતી. ચાલુ વર્ષ 2020-21 દરમિયાન વિવિધ 3987 એકમોની તપાસ કરવામાં આવી હતી.

જેમાં વજનમાપ કાયદા નિયમો તથા શરતોના ભંગ કરવા બાબતની ક્ષતિઓ બદલ કુલ 192 એકમો સામે કાયદેસર કાર્યવાહી કરી આ એકમો પાસેથી ગુન્હા માંડવાળ ફી પેટે રૂ.2,66,700 વસૂલ કરવામાં આવ્યાં તથા 3307 એકમોની ચકાસણી કરી રૂ.29,46,148 ચકાસણી ફી તથા વિલંબિત ફી અને અન્ય ફી સહિત કુલ રૂ.40,24,528ની વસૂલાત કરવામાં આવી હતી. આ કામગીરીમાં જિલ્લા અધિકારી કે.એમ.રાવળ અને અન્ય કર્મચારીઓ જોડાયા હતા. કોરોનાની મહામારીના કારણે સરકાર દ્વારા વિલંબિત ચકાસણી ફીમાં આપેલી રાહત તા.31 ડિસેમ્બર,2020 સુધી જ હોય બાકી રહેલા એકમોએ વહેલી તકે ચકાસણી મૂલ્યાંકન કામગીરી કરાવી લેવા તાકીદ કરાઈ છે.