કાર્ડે વિવાદ:રાજ્ય સરકારની કરકસરની સુચનામાં કોર્પો.ના નવા વર્ષના કાર્ડે વિવાદ સર્જયો

કોરોનાને કારણે દેશનું અર્થતંત્ર ડામાડોળ થઇ ગયું હોય છે. રાજ્ય સરકાર દ્વારા કોઈ બિનજરૂરી ખર્ચ નહીં કરવા મંત્રીઓ, ધારાસભ્યો સહિતનાને દિપાવલી શુભેચ્છાના કાર્ડ નહીં છપાવવા સુચના અપાઈ છે ત્યારે ભાવનગર કોર્પોરેશને નૂતનવર્ષ સ્નેહમિલનના કાર્ડ છપાવતા વિવાદ સર્જાયો છે. ભાવનગર મહાનગરપાલિકા દ્વારા નૂતન વર્ષે સ્નેહ મિલનની પ્રણાલી આવકારદાયક છે. સમગ્ર રાજ્યમાં આવો કાર્યક્રમ એકમાત્ર ભાવનગરમાં જ યોજાય છે. જે ભાવનગર માટે પણ ગૌરવ પ્રદ છે. પરંતુ વર્તમાન કોરોનાની પરિસ્થિતિમાં સંક્રમણ ફેલાય નહીં તે માટે સરકાર દ્વારા સોશિયલ ડિસ્ટન્સ જાળવવા સામાજિક સહિતના કાર્યક્રમોમાં માત્ર 200 વ્યક્તિઓની મર્યાદા રાખવા ગાઈડ લાઇન બહાર પડાયેલી છે.

ત્યારે ભાવનગર કોર્પોરેશન દ્વારા આગામી 16મી નવેમ્બરને સોમવારના રોજ સવારે 8 થી 8:30 અટલબિહારી બાજપાઈ ઓપન એર થિયેટર ખાતે નૂતન વર્ષ સ્નેહમિલનનું આયોજન કરવામાં આવ્યું છે. સમગ્ર નગરજનોને પણ તેમાં આમંત્રિત કરાયા છે. ત્યારે કોરોના સંદર્ભિત સરકારની ગાઇડ લાઇનની અમલવારી કઈ રીતે થઇ શકશે તે પણ એક મોટો પ્રશ્ન છે. કોર્પોરેશનમાં 52 નગરસેવકો, અધિકારીઓ, ભાજપ કોંગ્રેસનું સંગઠન, સંસ્થાના પ્રતિનિધિઓ, વકીલો, નગર શ્રેષ્ઠીઓ સહિતના એકત્રિત થાય તો પણ 200 વ્યક્તિઓથી સંખ્યા વધી જાય.