આયોજન:મહાતપસ્વિની લક્ષ્મીદેવીના 180 ઉપવાસની પૂર્ણાહુતી

મહારાષ્ટ્રના નાસિક જિલ્લામાં આવેલા વણી ખાતે પાર્શ્વાભ્યુદય તીર્થમાં મહાતપસ્વીની લક્ષ્મીદેવી પૂનમચંદ ડાગાના 180 ઉપવાસ તપની મંગલ પૂર્ણાહુતી નિમિતે આગામી 30-31 ડિસેમ્બરના વિશિષ્ટ આયોજન છે. તપાગચ્છાધિરાજ આચાર્ય મીમદ વિજય રામચંદ્રસૂરિશ્વરજી મહારાજના ગચ્છનાયક આચાર્ય વિજય પુણ્યપાલસૂરિ, આચાર્ય મુકિતપ્રભસૂરિજી, આચાર્ય કીર્તીયશસૂરિશ્વરજી, આચાર્ય શ્રેયાંસપ્રભસૂરિશ્વરજીની પાવન નિશ્રામાં આયોજન કરાશે. આ પાવન પ્રસંગના પ્રથમ દિવસે તા.30 ડિસેમ્બરના શ્રી વર્ધમાન શક્રસ્તવ અભિષેક કરવામાં આવશે. તા.31 ડિસેમ્બર ગુરૂવારના સવારે 6-30 કલાકે સમુહ દર્શન, સવારે 7 કલાકે માંગલિક પ્રવચન-પચ્ચખાણ પ્રદાન જયારે સવારે 8 કલાકે તપની પૂર્ણાહૂતિના પારણા કરવામાં આવશે.

લક્ષ્મીદેવી પૂનમચંદ ડાગાએ એક તપસ્વી ધર્મ આરાધક છે. જેમને બાળપણથી જ ધર્મમાં રૂચિ હતી. તેઓ ધણા વર્ષથી ભીષ્મ તપ, વીસ સ્થાનકતપ, વર્ષીતપ અઠ્ઠમથી એક વાર, વર્ષીતપ છઠ્ઠથી બે વાર, વર્ષીતપ ઉપવાસથી બે વખત કર્યા છે. અને અનેક મહાતપ પણ સરળતાથી કર્યા છે. વિક્રમ સંવત 2076ના અષાઢ સુદ 14 ના તેઓએ મુંબઇમાં ભુલેશ્વર, શેઠ મોતીશા લાલબાગ જૈન સંઘના આંગણેથી 180 ઉપવાસ તપનો મંગલ પ્રારંભ કર્યો હતો. છેલ્લા કેટલાક સમયથી નડી રહેલી શારીરિક અશકિતનુ વિધ્ન પણ તેમના તપને અટકાવી શકયુ નહોતુ.