રજૂઆત:ભાવનગર-અમદાવાદ ફોર ટ્રેક રોડ સત્વરે પૂર્ણ કરો : ચેમ્બર

ભાવનગર-અમદાવાદ વચ્ચેનો સડકમાર્ગ ફોર ટ્રેક કરવા માટેની કામગીરી કોલ્ડ બોક્સમાં ધકેાલાઇ ગઇ હોવાથી મુખ્યમમંત્રી, નાયબ મુખ્યમંત્રીને પત્ર લખવામાં આવ્યા છે. ભાવનગરથી બાવળીયાળી સુધીનો રસ્તો 4 ટ્રેક બની ગયો છે, પિપળીથી ફેદરા, બગોદરા, અમદાવાદનો રસ્તો 4 ટ્રેક છે. પરંતુ બાવળીયાળીથી પિપળી વચ્ચેનો 40 કિ.મી.નો રસ્તો 4 ટ્રેક બનાવવા માટેની યોજના લાંબા સમયથી પડતર છે.

આ 40 કિ.મી.નો રસ્તો નેશનલ હાઇ-વે ઓથોરિટીને સોંપી દેવામાં આવતા આ કામ અટકી પડ્યુ હોવાની બાબતનો ઉલ્લેખ સૌરાષ્ટ્ર ચેમ્બર ઓફ કોમર્સ એન્ડ ઇન્ડસ્ટ્રીઝ દ્વારા પત્રમાં કરી અને ધોલેરા સરના ટાઉન પ્લાનિંગ મુજબ ક્યારે રસ્તો થાય તે નક્કી નથી. ભાવનગર - અમદાવાદના હયાત રસ્તાની બંને તરફ સ્ટેટ હાઇ-વે દ્વારા જમીન સંપાદિત થઇ ચૂકેલી છે, આ જમીનોનો કબજો સરકાર હસ્તક છે. તેથી વહેલી તકે 40 કિ.મી.નો રસ્તો 4 માર્ગીય કરી અને ભયજનક વળાંકો, અકસ્માતોથી લોકોની જીંદગી બચાવી શકાય તેમ છે. ધોલેરા સરના વિકાસ કરવા માટે પણ આ રસ્તો મુખ્ય છે, તેને પણ ધ્યાનમાં રાખી અને સત્વરે કામ પૂર્ણ કરવા રજૂઆત કરવામાં આવી છે.