સંકલ્પ:ભાજપ, નહીં થયેલા કાર્યો કરવા માટે સંકલ્પ પત્રમાં થયા કટિબદ્ધ

મહાનગર પાલિકાની આગામી ચૂંટણી સંદર્ભે ભાજપ દ્વારા આજે પ્રજાને આંબા-આંબલી દેખાડતા કાર્યો કરવા માટે કટિબદ્ધતા દેખાડી શિક્ષણ મંત્રીએ સંકલ્પ પત્ર બહાર પાડ્યું હતું. ભાવનગર મહાનગરપાલિકામાં ભાજપના શાસનમાં કરેલા વિકાસ કાર્યો દર્શાવી અને બાકી રહી ગયેલા કાર્યો માટે કટિબદ્ધતા દેખાડી આજે શિક્ષણ મંત્રી ભુપેન્દ્રસિંહ ચુડાસમાએ ભાજપના સંકલ્પ પત્રનું વિમોચન કર્યું હતું. સંકલ્પ પત્રમાં ભાજપના શાસનમાં નહી થયેલા કાર્યો કરવા માટે સંકલ્પ કર્યો હતો.

જેમાં ઇન્દોર જેવા શહેરને રોલ મોડલ તરીકે સ્વીકારી સ્વચ્છતા જાળવવા, ટ્રાફિક નિયમન અને પાર્કિંગ, નવી ટાઉન પ્લાનિંગ સ્કીમમાં ઈન્ફ્રાસ્ટ્રક્ચર, ફાયર સેફટી, બગીચા પાર્ક માટે મિશન પ્રકૃતિપ્રેમ, ક્વિક રિસ્પોન્સ સેલ માટેના કાર્યો માટે સંકલ્પ કર્યો હતો જ્યારે રોડના અધુરા કામો, બિલ્ડીંગ, રોશની, ડ્રેનેજ, આવાસ યોજના અને ખાસ તો છેલ્લા ઘણા વર્ષોથી શાસક પક્ષ પર લીઝ પટ્ટામાં ભ્રષ્ટાચારના આક્ષેપો થાય છે ત્યારે તેનું સરળીકરણ અને ઉત્તર કૃષ્ણનગર તેમજ કુંભારવાડા વિસ્તારમાં ચાલતા ગૃહ ઉદ્યોગો પર શાસકોએ કોમર્શિયલ ટેક્સ લાદી ગરીબ માણસોની કમર તોડી નાખી છે ત્યારે અવારનવાર રજૂઆતો અને માગણી છતાં વેરામાં રાહત નહીં આપેલી તે આગામી દિવસોમાં રાહત આપવા માટે કટિબદ્ધતા દેખાડી છે.