કોરોના બેકાબૂ:શહેર અને તાલુકા-ગ્રામ્ય કક્ષાએ બે-બે પોઝિટિવ કેસનો ઉમેરો, શહેરમાં 8 અને ગ્રામ્યમાં 11 દર્દીઓ કોરોનાની સારવારમાં

ભાવનગર શહેર અને જિલ્લામાં આજે કુલ મળીને ચાર નવા પોઝિટિવ કેસ નોંધાયા હતા તો સામા પક્ષે ચાર દર્દીઓ કોરોનામુક્ત થતા હિસાબ બરાબરીનો રહ્યો હતો. હાલ ભાવનગર શહેર અને જિલ્લામાં કુલ 19 દર્દીઓ કોરોનાની સારવાર હેઠળ છે. સમગ્ર જિલ્લામાં અત્યાર સુધીમાં કોરોના પોઝિટિવના કુલ 6116 કેસ મળ્યા છે અને તેની સામે 6028 દર્દીઓ કોરોનામુક્ત થતા સમગ્ર જિલ્લામાં કોરોનાનો રિકવરી રેઇટ 98.56 ટકા નોંધાયો છે. શહેરમાં હાલ કોરોનાના 8 અને તાલુકા-ગ્રામ્યના 11 મળી કુલ 19 દર્દીઓ સારવાર લઇ રહ્યાં છે. શહેર-જિલ્લામાં આજ સુધીમાં કુલ 69 લોકોના કોરોનાથી સરકારી ચોપડે મોત થયા છે.

ભાવનગર શહેરમાં આજે કોરોનાના બે પોઝિટિવ કેસ નોંધાયા હતા જેમાં એક પુરૂષ અને એક મહિલાનો સમાવેશ થાય છે. જ્યારે બે દર્દી કોરોનામુક્ત થયા હતા જેમાં એક પુરૂષ અને એક મહિલાનો સમાવેશ થાય છે. શહેરમાં અત્યાર સુધીમાં કોરોના પોઝિટિવના કુલ કેસ 4029 નોંધાયા છે અને તે પૈકી 3978 દર્દીઓ કોરોનામુક્ત થતા રિકવરી રેઇટ 98.73 ટકા નોંધાયો હતો. ભાવનગર તાલુકા-ગ્રામ્ય કક્ષાએ આજે ગારિયાધારમાં 72 વર્ષીય મહિલા અને સિહોરના સાગવાડી ખાતે 36 વર્ષીય પુરૂષને કોરોના પોઝિટિવ જાહેર કરાયા હતા. તો સામા પક્ષે બે દર્દીઓ કોરોનામુક્ત થયા હતા. તાલુકા-ગ્રામ્ય કક્ષાએ આજ સુધીમાં કુલ પોઝિટિવ કેસ 2087 નોંધાયા છે અને તેની સામે આજ સુધીમાં 2050 દર્દીઓ કોરોનામુક્ત થતા રિકવરી રેઇટ 98.23 ટકા થયો છે.