આગ ભભૂકી:ભાવનગરના સિહોરમાં હાઇ-વે પર ઘાસ ભરેલો ટ્રક ભડભડ સળગીને ખાક

સિહોર ભાવનગર રોડ પર સર્વોત્તમ ડેરી પાસેથી પસાર થઇ રહેલા ઘાસ ભરેલા એક ટ્રકમાં અકસ્માતે આગ લાગતા ટ્રકમાં રહેલ તમામ ઘાસનો જથ્થો અને ટ્રક પણ બળીને ખાક થઇ જવા પામ્યો હતો. બનાવને પગલે હાઇ-વે પર ટ્રાફિક જામના દશ્યો સર્જાયા હતા.ફાયર ફાઇટર ઘટના સ્થળે પહોંચી જઇ આગને મહામહેનતે કાબુમાં લીધી હતી. જ્યારે શહેરના નિર્મળનગર વિસ્તારમાં આવેલ આટામીલના ખુલ્લા મેદાનમાં સુકા ઘાસમાં આગ લાગ્યાની જાણ ફાયરબ્રિગેડને કરાતા ફાયર સ્ટાફ ઘટના સ્થળે દોડી જઇ આગને બુજાવી નાખી હતી.

પ્રાપ્ત વિગતો અનુસાર સિહોરના ગુંદાળા પાસે આવેલ એસ આર ના પંપ નજીક અચાનક એક કડબ(ઘાસ) ભરેલા આઇશર ટેમ્પો નં GJ-4 5897 માલિક ધનજીભાઈ વાલજીભાઈ આગે લાગતા તાત્કાલિક સિહોર નગરપાલિકા ફાયર વિભાગને જાણ કરી હતી. નગરપાલિકા ફાયર વિભાગ તાત્કાલિક ઘટના સ્થળે પહોંચી હતી અને લગભગ દસ હજાર લિટર પાણીનો છંટકાવ કરી આગ પર કાબૂ મેળવ્યો હતો. જોકે આગથી કેટલું નુકસાન થયું એ હાલ જાણવા મળ્યું નથી. બનાવમાં સદનસિબે કોઇ જાનહાની થઇ નથી.