સમીક્ષા બેઠક:ભરૂચ જિલ્લા ચૂંટણી તંત્ર કોવિડની ગાઈડલાઈન સાથે કામગીરી કરશે

ભરૂચના કલેક્ટર કચેરીના સભાખંડમાં શુક્રવારના રોજ જિલ્લા ચૂંટણી અધિકારી અને કલેકટર ડો.એમ.ડી. મોડિયાના અધ્યક્ષ સ્થાને મહત્વની બેઠક યોજાઈ હતી.સદર બેઠકમાં જિલ્લા કલેક્ટરે આદર્શ આચારસંહિતના ચૂસ્ત અમલીકરણની સાથે સોંપાયેલી કામગીરી ક્ષતિરહિત, ચીવટપૂર્વક અને નિયત સમયમર્યાદામાં પૂર્ણ કરવા અને થયેલી કામગીરીથી જિલ્લા ચૂંટણીતંત્રને સમયાંતરે વાકેફ કરવાની હિમાયત કરી હતી.

બેઠકમાં ચૂંટણી પ્રક્રિયા દરમ્યાન મતદાન મથકની વિઝીટ,સ્ટાફ તાલીમ મેનેજમેન્ટ, મટીરીયલ મેનેજમેન્ટ, ઇવીએમ સ્ટ્રોંગરૂમ, ડીસ્પેઝ તેમજ રીસીવર સેન્ટરની મુલાકાત, કોવિડ-19ની ગાઇડલાઈન પાલન સાથે કામગીરી કરવા જણાવ્યું હતું. સાથે ઉમેદવારોના હિસાબનું મોનીટરીંગ, તથા નિમાયેલા નોડલ અધિકારીઓને ફરજ પર આંતરિક રીતે યોગ્ય સંકલન સાથે ચૂંટણીને લગતી તમામ કામગીરી મુકત,ન્યાયી, નિષ્પક્ષ અને તટસ્થ રીતે વધુ સુદઢતાથી થાય અને રાજય ચૂંટણી આયોગની માર્ગદર્શિકા મુજબ આદર્શ આચારસંહિતાનું યોગ્ય ચુસ્તપાલન થાય તેની કાળજી રાખવાની પણ અધિકારીઓને સુચના આપી હતી.