બર્ડ ફલૂની દહેશત:ભરૂચમાં 20 કાગડાના મોતનો રિપોર્ટ નેગેટિવ

ભરૂચના વેજલપુર વિસ્તારના બામણીયા ઓવારા નજીક 20 કાગડા મૃત હાલતમાં મળી આવ્યા હતા. જેથી તંત્રે કાગડાઓના મોત કયા કારણોસર થયા છે તે અંગે પશુપાલન વિભાગના અધિકારીઓએ મૃતદેહોનો સેમ્પલ લઈ તપાસ અર્થે પુના લેબમાં મોકલી આપ્યા હતા.

બર્ડ ફલૂની દહેશત અને સાવચેતીના ભાગરૂપે અધિકારીઓએ ભરૂચમાં આવેલી ચીકનશોપ તેમજ મરઘાં ઉછેર કેન્દ્રનો તપાસ હેતુ સર્વે હાથ ધર્યો હતો.જે અંગેનો બુધવારે લેબ રિપોર્ટ આવ્યો હતો.જેમાં જિલ્લા પશુપાલન વિભાગના ડો.આર.એન નાઈના જણાવ્યા અનુસાર, વેજલપુર ખાતે 20 થી વધુ મૃત હાલતમાં મળી આવેલા કાગડાઓને પુના લેબ ટેસ્ટ માટે મોકલાવ્યા હતા. જેનો રિપોર્ટ નેગેટિવ આવ્યો છે. કાગડાના મોતનો રિપોર્ટ નેગેટિવ આવતા તંત્રે રાહતનો શ્વાસ લીધો છે.