દુર્ઘટના:મજૂરીના રૂપિયા મામલે લેબર સપ્લાયરને 4 જણા ઉઠાવી ગયાં

વાગરા તાલુકામાં આવેલાં ગલેન્ડા ગામે રહેતાં અને મેઘમણી કંપનીમાં લેબર સપ્લાયનું કામ કરતાં શખ્સે કેટલાંક શ્રમજીવીઓના રૂપિયા આપવાના બાકી હતાં. તે દરમિયાન ગત 27મીએ તેમના ઘર પાસે કારમાં આવેલાં 4 શખ્સોએ તેમનું અપહરણ કરી ફરાર થઇ ગયાં હતાં. બનાવ સંદર્ભે અપહ્રુતની પત્નીએ દહેજ પોલીસ મથકે ફરિયાદ નો઼ધાવતાં પોલીસે ગુનો નોંધી આગળની કાર્યવાહી હાથ ધરી છે.

વાગરા તાલુકામાં આવેલાં ગલેન્ડા ગામે રહેતો અને મુળ એમપીનો વતની રામજી ઇશુરદીન કુશ્વાહ દહેજની મેઘમણી કંપનીમાં લેબર સપ્લાયનું કામ કરે છે. ગત ઓક્ટોબરમાં તેમના વતને ગયાં હતાં. જ્યાંથી પરત આવ્યા બાદ તેમને મજુરોના રૂપિયા ચુકવવાના હોઇ તેઓ પગારના બીલ બનાવવા કંપની પર ગયાં હતાં. જ્યાંથી આવ્યાં બાદ તેઓ ગત 27મીએ તેઓ તેમની પત્ની સુંદરીબાઇ સાથે ખરીદી કરવા ગયાં હતાં. જ્યાંથી પરત ફરતાં તેમને રસ્તામાં એક કારમાં આવેલાં હુમલા ભીમા બબેરીયા તેમજ રાજૂ નામના બે શખ્સો સહિત 4 જણાએ રોકી તેમની સાથે મજૂરીના રૂપિયા બાબતે તકરાર કરતાં મામલો ગરમાયો હતો. ઉશ્કેરાયેલાં ચારેય જણાએ તેનું અપહરણ કરી જતાં તેમની પત્નીએ દહેજ પોલીસ મથકે પતિના અપહરણ સબબની ફરિયાદ નોંધાવતાં પોલીસે આગળની કાર્યવાહી હાથ ધરી છે.