તપાસ:આમોદમાં બાળમજૂરીના મામલે શખ્સ વિરૂદ્ધ ગુનો

આમોદ ચાર રસ્તા પર આવેલી ચ્હાની લારીના સંચાલક દ્વારા 12 વર્ષના બાળક પાસે મજૂરી કરાવવામાં આવતા તેની સામે શ્રમ આયુક્તની ટીમે આમોદ પોલીસ મથકે ફરિયાદ નો઼ધાવી હતી.

ભરૂચની શ્રમ આયુક્તની કચેરીના અધિકારી રવિન શૈલેષ બ્રહ્મભટને પેન્સીલ પોર્ટલ પરથી ફરિયાદ મળી હતી કે, આમોદના ચાર રસ્તા પર આવેલી એક લારીના સંચાલકે 12 વર્ષના બાળકને મજૂરીએ રાખી તેની પાસે કામ કરાવવામાં આવી રહ્યું છે. જેના પગલે ટીમે તુરંત સ્થળપર દોડી આવી તપાસ હાથ ધરતાં સાજીદ વલી પટેલ (રહે. મછાસરા, ટેકરા ફળિયુ)નામનો શખ્સ તેની ચ્હાની લારી પર પૃથ્વી નિતેશ પઢિયાર(રહે. નવા વાડિયા) નામના 12 વર્ષના બાળકને કામે રાખ્યો હોવાનું માલુમ પડ્યું હતું. ટીમે બાળક તેમજ ચ્હાની લારી સંચાલક સાજીદની પુછપરછ કરતાં બાળક છેલ્લા બે મહિનાથી તેના ત્યાં કામ કરતો હોવાનું માલુમ પડ્યું હતું. ઘટનાને પગલે ભરૂચની મદદનીશ શ્રમ આયુક્તની કચેરીના અધિકારી રવિન બ્રહ્મભટે આમોદ પોલીસ મથકે ચ્હાની લારી સંચાલક સામે બાળ મજૂરીની કમલો હેઠળ ફરિયાદ નોંધાવતાં આમોદ પોલીસે તેની સામે ગુનો નોંધી આગળની કાર્યવાહી હાથ ધરી છે.