વિવાદ:લીંમડી-પખાજણ-અંભેલ જમીન સંપાદન મુદ્દે વિવાદ; દહેજ SEZમાં સંપાદિત થયેલી 1740 જમીનના વળતર મુદ્દે ખેડૂતો અને ખેડૂત હિત રક્ષક સમિતિ સામસામે

દહેજ સેઝના બીજા એકમ માટે જીઆઇડીસી દ્વારા લીમડી,પખાજણ ,અંભેલ ગામોની જમીન સંપાદનની પ્રક્રિયાને લઇને પુન: વિવાદ સર્જાયો છે. એક તરફ ત્રણેય ગામોના ગ્રામ પંચાયત ના હોદ્દેદારોએ મુખ્યમંત્રીને પત્ર પાઠવી આભાર વ્યક્ત કરવા સાથે ખેડૂત હિતના નામે કેટલાક તત્વો ખોટી રીતે વાદવિવાદ ઉભા કરતા હોવાના આક્ષેપો લગાવ્યા છે. ત્યારે બીજી તરફ ખેડૂત હિતરક્ષક દળ દ્વારા લાંબા સમયથી જમીન સંપાદનની પ્રક્રિયામાં ભ્રષ્ટાચાર થયો હોવાના આક્ષેપ સાથે લડત ચલાવાઈ રહી છે. ભ્રષ્ટાચાર અંગે તાજેતરમાં જ તેમણે તકેદારી આયોગમાં પણ લેખિત ફરિયાદ કરી હતી.