તસ્કરી:ભરૂચ હાઇવે પર કારનો કાચ તોડી રૂા. 2.10 લાખનો સામાન ચોરાયો, રાજસ્થાનનો પરિવાર કાર લઇને મુંબઇથી વતન નીકળ્યો હતો

મુંબઇના ભાયખલ્લા વિસ્તારમાં રહેતો પરિવાર તેમની જીપ કમ્પાસ કારમાં રાજસ્થાન તેમના વતને જવા માટે નિકળ્યો હતો. દરમિયાન ભરૂચ હાઇવે પર આવેલી એક હોટલ પર તેઓ જમવા માટે ઉભા રહ્યાં હતાં. અરસામાં કોઇ ગઠિયાએ તેમની કારનો કાચ તોડી કારમાંથી 2.10 લાખ રૂપિયાનો સામાન ભરેલી બે બેગ તેમજ પર્સની ચોરી કરી રફુચક્કર થઇ ગયો હતો. બનાવ સંદર્ભે ભરૂચ સી ડિવિઝન પોલીસે ગુનો નોંધી આગળની કાર્યવાહી હાથ ધરી છે.

મુળ રાજસ્થાનના બેડા ગામના વતની અને મુંબઇના ભાયખલ્લા વિસ્તારમાં રહેતાં શ્રીપાલ જયંતીલાલ શાહ તેમની પત્ની જયાબેન, પુત્ર ઋષભ તેમજ પુત્રવધુ ધ્રુવિકા સાથે તેમની જીપ કમ્પાસ કાર લઇને તેમના વતને જવા માટે નિકળ્યાં હતાં. દરમિયાનમાં તેઓ ભરૂચ હાઇવે પર વડદલા પાસે આવેલી એક હોટલમાં રાત્રીના સમયે જમવા માટે ઉભા રહ્યાં હતાં. તેમણે ભોજન કરી પરત આવી જોતા તેમના કારનો પાછળનો કાચ તોડી કારમાંથી બે મોટા બેગ, એક હેન્ડ બેગ, એક લેડિઝ પર્સ જેમાં રોકડા રૂપિયા 1.30 લાખ તેમજ સોનાના દાગીના મળી 2.10 લાખનો મુદ્દામાલ ભરેલો સામાન કોઇ ગઠિયો ચોરી કરી ગયો હતો. બનાવ સંદર્ભે તેમણે ભરૂચ સી ડિવિઝન પોલીસ મથકે ફરિયાદ નોંધાવી હતી. ઘટના પગલે ભરૂચ સી ડિવિઝન પોલીસની ટીમે આસપાસના વિસ્તારમાં લગાવેલા સીસીટીવી કેમરાના ફૂટેજ મેળવી તેના આધારે કારનો કાચ તોડી ચોરીને અંજામ આપનાર ગઠિયાઓના સગડ મેળવવાની કવાયત હાથ ધરવામાં આવી છે.