લોકોમાં ભય:ભરૂચમાં જૈન દેરાસરમાં ચોરી માટે તસ્કરોનો દરવાજો તોડવાનો પ્રયાસ

ભરૂચના હોસ્ટેલ ગ્રાઉન્ડની પાછળ આવેલાં જૈન દેરાસરમાં રાત્રીના સમયે તસ્કરોએ ચોરી કરવાનો પ્રયાસ કર્યો હતો. પાંચ જેેટલાં તસ્કરોએ જૈન દેરાસરનો દરવાજાને સળીયાથી તોડવાનો પ્રયાસ કર્યો હોવાની સમગ્ર ઘટના મંદિરના સીસીટીવી કેમેરામાં કેદ થઇ ગઇ હતી. જોકે, તસ્કરો ચોરી કરવામાં નિષ્ફર રહેતાં ત્યાંથી રફુચક્કર થઇ ગયાં હતાં. બનાવ સંદર્ભે આ લખાય છે ત્યાં સુધી કોઇ પોલીસ ફરિયાદ નોંધાઇ ન હતી. જોકે, સીસીટીવી ફૂટેજના આધારે પોલીસ તસ્કરોના પગેરૂ મેળવવામાં જોતરાઇ છે.

અત્રે ઉલ્લેખનિય છે કે, ગઇકાલે પણ તસ્કરોએ શહેરમાં લિંકરોડ તેમજ સ્ટેશન રોડ પર આવેલાં બે કોમ્પ્લેક્ષની કુલ 5 દુકાનોના શટર તોડ્યાં હતાં. ત્યારે સતત બે દિવસથી તસ્કરોની ચહલપહલથી લોકોમાં ભયનો માહોલ ફેલાયો છે. ઉપરાંત પોલીસ દ્વારા નાઇટ પેટ્રોલિંગ વધુ સઘન બનાવાય તેવી આશા વ્યકત કરી છે.