દિલધડક CCTV:ભરૂચમાં રિક્ષાને ઓવરટેક કરવા જતાં બાઇક ઇકો સાથે અથડાઈ; હવામાં ફંગોળાતો વિદ્યાર્થી કેમેરામાં કેદ

ભરૂચના સેવાશ્રમ રોડ પર આવેલા સ્ટેચ્યૂ પાર્ક નજીક બાઈક અને ઇકો વચ્ચે થયેલા અકસ્માતની ઘટના સીસીટીવી કેમેરામાં કેદ થઇ ગઇ છે. ધો.11નો વિદ્યાર્થી મિત્રને લેવા માટે બાઈક પર જઇ રહ્યો હતો ત્યારે રિક્ષાને ઓવરટેક કરવા જતાં ઇકો સાથે અથડાયો હતો. ઇકો સાથે બાઈક અથડાતાં યુવક હવામાં ફંગોળાયો હતો. ગુરુવારે બનેલી આ ઘટનાના સીસીટીવી સામે આવ્યા છે.

મિત્રને લેવા માટે બાઇક પર જતો હતો

બનાવની પ્રાપ્ત માહિતી અનુસાર, ભરૂચના લિંક રોડ પર આવેલા યોગેશ્વર નગરમાં રહેતો અને ધો. 11 સાયસન્સમાં અભ્યાસ કરતો વેદાંત જગલાવાલા ગુરુવારે સવારે 8 વાગ્યાની આસપાસ ભરૂચના સેવાશ્રમ રોડ પરથી પોતાના મિત્રને લેવા બાઈક પર જઈ રહ્યો હતો. એ દરમિયાન સ્ટેચ્યૂ પાર્ક નજીક સામેથી આવતી ઇકો કાર સાથે ધડાકાભેર અથડાતાં વેદાંત હવામાં ફંગોળાયો હતો અને માર્ગની સાઈડ પર પટકાતાં તેને ગંભીર ઈજાઓ પહોંચી હતી. વેદાંતને સારવાર અર્થે નજીક હોસ્પિટલમાં ખસેડવામાં આવ્યો હતો.

ઓવરટેક કરવું ભારે પડ્યું

અકસ્માતના જે સીસીટીવી સામે આવ્યા છે એમાં જોઇ શકાય છે કે વેદાંત નામનો વિદ્યાર્થી બાઈક લઇને સ્ટેચ્યૂ પાર્ક નજીકથી પસાર થાય છે. એ સમયે રિક્ષાને ઓવરટેક કરવાનો પ્રયત્ન કરે છે. ઓવરટેક કરતી વખતે તેનું બાઈક ઇકોના આગળના ભાગે ધડાકાભેર અથડાય છે અને તે હવામાં ફંગોળાઈને જમીન પર પટકાય છે.