• Gujarati News
  • Local
  • Gujarat
  • Bharuch
  • દહેજની વેલ્સપન કંપનીના 250 કર્મચારીઓ પરિવાર સાથે રસ્તા પર ઉતર્યા, દહેજ ભરૂચ માર્ગ એક કલાક સુધી રોકી રાખતા પોલીસે 100 કર્મચારીઓની અટકાયત કરી

દહેજની વેલ્સપન કંપનીમાં પાંચ મહિનાથી ચાલતુ આંદોલન ઉગ્ર:250 કર્મીઓ પરિવાર સાથે રસ્તા પર ઉતર્યા, દહેજ-ભરૂચ માર્ગ એક કલાક સુધી બ્લોક કર્યો, 100ની અટકાયત

ભરૂચ19 દિવસ પહેલા
  • રહિયાદ ચોકડી ઉપર વહેલી સવારે પરિવાર સાથે રસ્તા રોકો આંદોલન, 100 જેટલા કર્મીઓની અટકાયત
  • LCB,SOG,દહેજ પોલીસ, મરીન, વાગરા સહિત મહિલા પોલીસનો કાફલા સાથે ACP અને SDM પણ દોડી ગયા

દહેજની વેલ્સપન કંપની બંધ કરી દેવાતા કર્મચારીઓની આજીવિકા છીનવાઈ ગઈ છે. છેલ્લા 150 દિવસથી કર્મચારી કંપની સામે આંદોલન ચલાવી રહ્યા છે. જે આજે ઉગ્ર બન્યું હતું. રહિયાદ ચોકડી ઉપર વહેલી સવારે 250 કર્મચારીઓ પરિવાર સાથે બેસી રસ્તા રોકો આંદોલન કરતા પોલીસના ઘાડે ધાડા ઉતરી પડ્યા હતા. પોલીસ અને પ્રશાસન તરફથી ACP અને SDMએ સમજાવવાનો પ્રયત્ન કરવા છતાં દહેજ-ભરૂચ માર્ગ એક કલાકથી રોકીને બેઠેલા કર્મચારીઓએ રસ્તો ખુલ્લો નહિ કરતા પોલીસે અટકાયતનો દોર શરૂ કર્યો હતો. રસ્તા પરથી 100 જેટલા કર્મીઓની અટકાયત કરતા રસ્તા રોકો આંદોલન વિખેરાયુ હતું.

દહેજનો પ્લાન્ટ બંધ થતા 400 કર્મચારીઓની મુશ્કેલીમાં વધારો
દહેજની વેલ્સપન કંપનીએ 5 મહિના પહેલા તેના 200 જેટલા અધિકારીઓની બદલી કરી નાખી હતી. જ્યારે 400 જેટલા કર્મચારીઓને ટપાલથી બદલીના ઓર્ડરો કરાયા હતા. દહેજનો પ્લાન્ટ બંધ કરી દેતા 400 કર્મચારીઓની રોજીરોટી છીનવાઈ હતી. જેઓ બદલીમાં અંજાર કે અન્ય પ્લાન્ટમાં જવા માંગતા ન હોય કંપની સામે આંદોલનનો માર્ગ અપનાવ્યો હતો.કર્મચારીઓના આંદોલનમાં સ્થાનિક સાંસદ અને ધારાસભ્યએ પણ તેઓની રજુઆતને વાચા આપી હતી. જે બાદ કંપની કર્મચારીઓ માટે VRS સ્કીમ લઈને આવી હતી. કંપનીના 118 જેટલા કર્મચારીઓએ VRS અપનાવી લીધું હતું. જોકે બાકીના કર્મચારીઓને કંપનીનું સ્વૈચ્છીક VRS મંજુર ન હોય આંદોલન ચાલુ જ રાખ્યું હતું.

વિરોધ કરી રહેલા 100 કર્મચારીઓની અટકાયત કરાઈ
વેલ્સપન કંપની બંધ થતાં કર્મચારીઓનું આંદોલન 150 દિવસમાં પ્રવેશવા છતાં નિવેડો નહિ આવતા સોમવારે વહેલી સવારથી 250 કર્મચારીઓ રહિયાદ ચોકડી ઉપર પરિવાર સાથે રસ્તા રોકો આંદોલન છેડવા ઉતરી આવ્યા હતા. કર્ણચારીઓએ મહિલાઓ અને બાળકો સાથે ભરૂચથી દહેજ જતા માર્ગ પર બેસી વાહન વ્યવહાર થોભાવવાનો પ્રયાસ કરતા કાયદો-વ્યવસ્થા જાળવવા જિલ્લા પોલીસ એક્શનમાં આવી હતી.દહેજ પોલીસ, મરીન, LCB, SOG, મહિલા પોલીસ સહિત જિલ્લા પોલીસના ઘાડે ધાડા રહિયાદ ચોકડી ઉપર ઉમટી પડ્યા હતા. સાથે જ PI, PSI, DYSP સાથે ASP વિકાસ સુંડા અને SDM પ્રજાપતિ પણ પણ સ્થળ પર દોડી ગયા હતા. કર્મચારીઓ અને તેમના પરિવારજનોને સમજાવી માર્ગ ખુલ્લો કરવા કહેવા છતાં કર્મચારીઓ નહિ હટતા આખરે પોલીસે ન છૂટકે રસ્તો રોકી ને બેઠેલા કર્મચારીઓને ડિટેઇન કરવાની કામગીરી હાથ ધરતા સ્થિતિ એક સમયે વિકટ બની હતી. પોલીસે 100 જેટલા વિરોધ કરી રહેલા કર્મચારીઓની અટકાયત કરી તેમને પોલીસ હેડ ક્વાટર્સ લઈ આવી હતી. જે બાદ કંપની ગેટ બહાર આંદોલન યથાવત રહ્યું હતું. બીજી તરફ બપોરે કલેકટરે આ મુદ્દે નિવેડો લાવવા બેઠકનું આયોજન કર્યું હતું.

અન્ય સમાચારો પણ છે...