અંતે પાલીકા તંત્ર જાગ્યું:ભરૂચમાં વિવિધ વિસ્તારમાંથી રાત્રે 15 રખડતા ઢોરને ડબ્બે પુરાયા, પશુ માલિકો સામે તગડો દંડ વસુલાશે

ભરૂચ નગર પાલિકા શહેરીજનો અને વાહન ચાલકોને રસ્તે રઝળતા પશુઓથી છુટકારો અપાવવા મોડે મોડે જાગી છે. નગર પાલિકાને શહેરના શક્તિનાથ, પાંચબત્તી, સ્ટેશન રોડ, કસક, લિંક રોડ, મહમદપુરા સહિતના વિસ્તારોમાં રખડતા ઢોરના ત્રાસની કેટલીય રજૂઆતો મળી હતી. જેને લઈ પાલિકા દ્વારા બુધવારે રાતે 10 કલાકથી ઢોર ડબ્બા ગાડી લઈ માર્ગો ઉપર અડિંગો જમાવેલા પશુઓને પકડવા ટીમ ઉતરી હતી. મળસ્કે સવારે 4 વાગ્યા સુધી ટીમ દ્વારા 15 રખડતા ઢોરોને પકડી જૈન પેઢીના કમ્પાઉન્ડમાં મોકલી અપાયા હતા.

ઢોર પકડવાની ઝુંબેશ કાર્યરત રહેશે
ઢોર પકડવામાં કામધેનુ ગૌરક્ષા સમિતિના ગૌરક્ષકો, પાલિકા સ્ટાફ અને ફાયર ટીમ જોડાઈ હતી. પાલિકા પ્રમુખ અમિત ચાવડાએ જણાવ્યું હતું કે, આગામી દિવસોમાં પણ રોજ રાતે રખડતા ઢોર પકડવાની ઝુંબેશ કાર્યરત રહેશે. પશુઓને માર્ગો ઉપર છોડી ટ્રાફિકજામ તેમજ અકસ્માતનું જોખમ વધારનારા પશુ માલિકો સામે કડક દંડની કાર્યવાહી કરાશે. બીજી તરફ રખડતા ઢોર પકડનાર કામધેનુ ગૌરક્ષા સમિતિએ શહેર જિલ્લામાં રખડતા પશુઓ માટે પાંજરાપોળની જમીન ફાળવવામાં તંત્ર નિષ્ફળ રહ્યું હોવાની પણ હૈયા વરાળ ઠાલવી છે.