રાજકારણ:રેતિ માફિયાઓ સામે તંત્ર ઘૂંટણીયે પુલીયા તોડવાનું વચન અધુરૂં રહ્યું

ઝઘડિયા તાલુકાના ટોઠીદરા ગામે નર્મદા નદી કિનારે રેતી માફિયાઓએ ગેરકાયદે બનાવેલા પુલીયા તોડવા શુક્રવારે ભુસ્તર વિભાગની ટીમ પહોંચી હતી. જ્યાં માત્ર એક પાળો તોડી કામગીરી કર્યાનો સંતોષ માન્યો હતો. જોકે, બીજા દિવસે પોલીસ પ્રોટેક્શન સાથે પુલિયા તોડી પાડવામાં આવશે તેવી ખાત્રી આપીને જતા રહ્યા હતા. બીજા દિવસે લોકોની નજર નદી કિનારા તરફ જ હતી પરંતુ સાંજ સુધી કોઈ ટીમ નહીં ફરકતાં તંત્ર જાણે રેતી માફિયાઓ સામે ઘુંટણીયે પડી ગયું હોય તેવું લોકોમાં ચર્ચાઈ રહ્યું છે. રેતિ માફીયાઓ સામે તંત્રએ નમતુ જોખ્યું હોય તેવું લાગી રહ્યું છે.

ઝઘડિયા તાલુકામાં ટોઠીદરા ખાતે અત્યાર સુધી રેતી માફિયાઓએ બેથી વધુ વખત ગેરકાયદેસર રીતે સરકારી જમીનમાં જ્યાંથી નર્મદા વહે છે ત્યાં પુલીયુ બનાવી દેવામાં આવ્યા હતા. તેને જવાબદાર તંત્ર દ્વારા તોડી નાખવામાં આવ્યા છે. તેમ છતાં ફરીથી તંત્ર સાથેની સાંઠગાંઠના કારણે રેતી વહન કરવા પુલિયા બનાવી દેવાઇ છે. ચાલુ સાલે ગેરકાયદેસર રીતે બનાવેલ પુલીયા બાબતે વારંવારની રજુઆતોના પગલે તંત્ર દ્વારા સરકારી જમીન પર ગેરકાયદેસર બનાવેલ પુલીયુ તોડવાનો નિર્ણય કરવામાં આવ્યો હતો.

ગતરોજ પોતાની મશીનરી લીધા વગર મોડી સાંજે આવેલા વહીવટીતંત્રએ ફક્ત પુલિયાના એક તરફનો થોડો ભાગ તોડી સંતોષ વ્યક્ત કર્યો હતો. આખું પુલીયુ તોડવા ગ્રામજનોના કહેવાથી અધિકારીઓએ જણાવ્યું હતું કે, આવતીકાલે અમો પોલીસ પ્રોટેક્શન સાથે મશીનરી લાવી પુલીયુ નેસ્ત નાબુદ કરી નાખીશું! પરંતુ અધિકારીઓએ ગ્રામજનોને કરેલો વાયદો માત્ર વાયદો જ રહ્યો છે. આજરોજ ટોઠીદરા ગામે તોડવાના બાકી રહેલા પુલીયાની કામગીરી માટે વહીવટી તંત્રનો એક પણ અધિકારી ફરક્યો નથી.