તપાસ:સુરવાડીની મહિલા સાથે લગ્ન કરી બે વર્ષમાં જ તરછોડી દેતાં ફરિયાદ

અંકલેશ્વર તાલુકાના સુરવાડી ગામે રહેતી ટીના વસંતભાઈ વસાવા અંકલેશ્વર જીઆઇડીસીમાં મજુરી કરતી હતી. બે વર્ષ પહેલાં ઝઘડિયા તાલુકાના ગોવાલી ગામનો સતીશ ફતેસિંગ ભાઈ વસાવા નામનો ઇસમ પણ તેની સાથે મજૂરી કામ કરતો હતો. આ દરમિયાન બંને ની આંખો મળી જતાં તેઓ બન્ને સુરવાડી ખાતે ટીના ના ઘરે તેના મા-બાપ સાથે રહેતા હતા. આજથી ચાર પાંચ મહિના અગાઉ સતીશ ટીના સાથે ઝઘડો કરી તેના ગામ ગોવાલી આવી ગયો હતો. જેથી ટીનાએ સતીશ વિરુદ્ધ ભરૂચ નારી કેન્દ્ર માં ફરિયાદ કરી હતી. નારી કેન્દ્ર માં થયેલી ફરિયાદની રીસ રાખી સતીશે ટીના ને ફોન કરી સમાધાન કરવા માટે મુલદ અને ગોવાલી ગામ વચ્ચે બોલાવી હતી અને ત્યાં બોલાવ્યા બાદ સતીશે જણાવેલ કે તું મારા સામે કેમ અરજી કરેલ છે ? હું તારા સાથે રહેવાનો નથી તેમ કહી ટીના ને ગમે તેમ ખરાબ ગાળો બોલી મોઢાના ભાગે લાફા મારી દીધા હતા. આ દરમિયાન લોકો ભેગા થઈ જતા સતીસે ટીનાને જાનથી મારી નાખવાની ધમકી આપી હતી. જેથી ટીના વસાવાએ સતીશ વસાવા વિરુદ્ધ ઝઘડિયા પોલીસ મથકમાં ફરિયાદ નોંધાવી છે.