અકસ્માત:ગોલ્ડન બ્રિજના એંગલમાં કાર ભટકાતા 2 કિમીનો ટ્રાફિકજામ

અંકલેશ્વર ભરૂચને જોડાતા ગોલ્ડન બ્રિજ પર બુધવારના રોજ સવારે અમદાવાદથી ગોલ્ડન બ્રિજ થઇ અંકલેશ્વર તરફ આવી રહેલા કાર ચાલકે ગોલ્ડન બ્રિજ મધ્યમાં અચાનક સ્ટિયરિંગ પર કાબુ ગુમાવ્યો હતો. જેના કારણે ગોલ્ડન બ્રિજની એંગલમાં કાર ધડાકાભેર ઘૂસી જવા પામી હતી. સદ્દનસીબે કારમાં બેસેલા લોકોનો આબાદ બચાવ થયો હતો. જો કે અકસ્માત ના પગલે ગોલ્ડન બ્રિજ પર તેમજ ભરૂચ અને અંકલેશ્વર બંને છેડે વાહનોની લાંબી કતાર જામી જવા પામી હતી.

અંકલેશ્વર તરફ દોઢથી બે કિમી લાંબી વાહનોની કતાર જોવા મળી હતી. કલાકો સુધી ટ્રાફિક જામ સર્જાયો હતો. ટ્રાફિક બ્રિગ્રેડ અને પોલીસ દ્વારા ટ્રાફિક રોકી ક્રેઇનની મદદથી કારને અંકલેશ્વર ખાતે લઇ આવી હતી. પુનઃ વાહન વ્યવહાર શરૂ કરાવ્યો હતો. જો કે કલાકો સુધી નોકરિયાત યુવાનો અટવાતા તેવોમાં રોજે રોજ સર્જાતા ટ્રાફિકજામની સમસ્યાને લઇ તંત્ર સામે રોષ જોવા મળ્યો હતો.