• Gujarati News
  • Local
  • Gujarat
  • Banaskantha
  • Taking Time Off From Work To Dig Up Villages, Going From House To House Persuading Farmers For Water Storage, The Campaign Started By Two Farmers Reached Two Thousand

બનાસકાંઠામાં ખેડૂતપુત્રીની કમાલ:નોકરીમાંથી સમય કાઢીને ગામડાં ખૂંદ્યાં, ઘરેઘરે જઈને ખેડૂતોને જળસંચય માટે સમજાવ્યા, બે ખેડૂતથી શરૂ કરેલું અભિયાન બે હજારે પહોંચ્યું

પાલનપુર3 મહિનો પહેલાલેખક: મુકેશ ઠાકોર
  • પાણીની સમસ્યાને લઈને હિરલ ચૌધરીએ બીડું ઉપાડ્યું
  • ચાર વર્ષની સફરમાં બે હજાર ખેડૂતને માર્ગદર્શન આપ્યું

બનાસકાંઠા જિલ્લામાં પાણીના પોકાર વચ્ચે ખેડૂતોએ હવે પાણી માટે જળસંચય અભિયાન હાથ ધર્યું છે. ચોમાસા દરમિયાન વહી જતા પાણીને જમીનમાં ઉતારી જમીનમાં તળ ઊંચા આવે એ માટે જાત મહેનતથી પ્રયત્નો હાથ ધર્યા છે. એક મહિલા તલાટી કર્મચારી દ્વારા આ જળસંચય અભિયાનની શરૂઆત કરાવવામાં આવી હતી. હાલ આ જળસંચય અભિયાનમાં મોટી સંખ્યામાં ખેડૂતો જોડાયા છે

ડાબેથી હિરલ ચૌધરી અને ખેડૂત માવજીભાઇ લોહ.
ડાબેથી હિરલ ચૌધરી અને ખેડૂત માવજીભાઇ લોહ.

ખેડૂતપુત્રીએ અભિયાનની શરૂઆત કરી
બનાસકાંઠાના સેમોદ્રા ગામે તલાટીની નોકરી કરતી ખેડૂતપુત્રી હિરલ ચૌધરીએ ખેડૂતોની વેદના જોઈને મનોમન નક્કી કર્યું કે ગામડાંમાં ખેડૂતોની સિંચાઇના પાણીની સમસ્યા દૂર કરવા કંઈક કરવું જોઈએ. ત્યાર બાદ આજથી ચાર વર્ષ પહેલાં હિરલ ચૌધરીએ નોકરીના સમયમાંથી સમય કાઢીને ગામડાં ખૂંદવાનું શરૂ કર્યું. જિલ્લાના અનેક તાલુકાના ગામડાંમાં ફરીને હિરલ ચૌધરીએ જળસંચય અંગે ખેડૂતોને સમજાવ્યા અને એમાં એને સફળતા મળી. શરૂઆત એક-બે ખેડૂતથી થઈ જ્યાં જૂના કૂવામાં ચોમાસાનું પાણી ઉતારવા માટેની વ્યવસ્થા કરવામાં આવી.

મનરેગા યોજના હેઠળ ખેડૂતોને લાભ પણ અપાવ્યો
એક-બે ખેડૂતથી શરૂઆત થતાં હિરલનો જુસ્સો વધ્યો અને તેણે પોતાનું આ અભિયાન ચાલુ જ રાખ્યું. હિરલ ચૌધરીએ વડગામ, પાલનપુર, દાંતીવાડા, લાખણી, ડીસા અને અમીરગઢ સહિતના તાલુકાઓમાં ખેડૂતો સાથે સંપર્ક કરી આ અભિયાન પર કામ કરતી રહી. આજે આ અભિયાનમાં બે હજાર જેટલા ખેડૂતો જોડાયા છે. એમાં ખેડૂતોએ પોતાના જૂના કૂવા અને જૂના બોરવેલમાં વરસાદી પાણી વાળવાનું શરુ કર્યું. આ અભિયાનમાં હિરલ ચૌધરીએ પાત્રતા ધરાવતા ખેડૂતોને મનરેગા યોજના હેઠળ લાભ પણ અપાવ્યો છે.

અત્યારથી જ આ સ્થિતિ હોય તો આગળ જઈને શું થશે?: હિરલ ચૌધરી
આ અંગે હિરલ ચૌધરીએ જણાવ્યું હતું કે આપણે દિવસે ને દિવસે જોઈએ છીએ કે પાણીના તળ બહુ ઊંડા જાય છે. ખેડૂતો પાસે જે ખેતીની જમીન હોય એમાં 80-90 ટકા જમીન પાણીના અભાવે પડતર પડી રહે છે અને માત્ર 10 ટકા જમીનમાં જ પિયત થાય છે, જેને કારણે ખેડૂતોને નુકસાન થાય છે. ઘણી જગ્યાએ ખેતરોમાં પશુપાલન માટે પાણીનાં ટેન્કરો લાવા પડતાં હોય છે. ઘણાં ગામડાંમાં હાલ પીવાનું પાણી પણ નથી મળતું. જો અત્યારથી જ આ સ્થિતિ હોય તો આગળ જઇને શું થશે?

આ અભિયાનમાં બે હજારથી વધારે ખેડૂતો જોડાયેલા: હિરલ ચૌધરી
હિરલ ચૌધરીએ વધુમાં જણાવ્યું હતું કે પાણી માટે ઘણા ખેડૂતો આંદોલન પણ કરી ચૂક્યા છે. બનાસકાંઠાના સેમોદ્રા ગામમાં ખેડૂતોને બહુ તકલીફ પડતી હતી. એ જોઇને ચાર વર્ષ પહેલાં મેં આ અભિયાનની શરૂઆત કરી. મેં નોકરી, ઘર અને પરિવારને મેનેજ કરીને ગામડે ગામડે ફરીને ખેડૂતનો સમજાવ્યા, તેમને જળસંચય વિશે માર્ગદર્શન પૂરું પાડ્યું. શરૂઆતમાં એક-બે ખેડૂતો માન્યા અને ત્યાર બાદ એક પછી એક ખેડૂતો માનતા ગયા. આજે આ અભિયાનમાં બે હજારથી વધારે ખેડૂતો જોડાયેલા છે.

ગયા વર્ષે અમે 100 જેટલા કૂવા રિચાર્જ કર્યા: ખેડૂત માવજીભાઇ લોહ
આ અંગે ખેડૂત માવજીભાઇ લોહએ જણાવ્યું હતું કે અમારા વિસ્તારમાં દોઢસો ફૂટ નીચે પણ પથ્થર જ છે. તો બીજી તરફ સતત નીચા ઊતરતા જળસ્તરને કારણે પાણીની તંગી સર્જાય છે. ઓછા વરસાદને કારણે પાણીના તળ ઊંડા જતાં ખેતીમાં બહુ તકલીફ પડે છે. આંદોલન કરતાં મલાણા તળાવ ભરવા સરકારે બાંયધરી આપી છે. તો બીજી તરફ હિરલબેન આખા જિલ્લામાં ફરીને જળસંચય માટે ખેડૂતોને સમજાવી રહ્યાં છે. તેમણે અમને ખૂબ માર્ગદર્શન આપ્યું છે. ગયા વર્ષે અમે 100 જેટલા કૂવા રિચાર્જ કર્યા એમાં હિરલબેનનો મહત્ત્વનો ફાળો રહેલો છે, સાથે ગામના 30 જેટલા યુવાનોએ પણ 24 કલાકમાંથી 18 કલાક મહેનત આના માટે જ કરી છે. હિરલબેનનું આ અભિયાન ભવિષ્ય માટે ખૂબ જ સારું છે, આનાથી ભવિષ્યમાં મોટો ફાયદો થશે.

અન્ય સમાચારો પણ છે...