ખજૂરનો ભાવ યથાવત:ડીસામાં હોળીના પર્વને લઈ ધાણી-ખજૂરના સ્ટોલ ખડકાયા; ગત વર્ષ કરતા ધાણીના ભાવમાં 20 ટકાનો વધારો

રંગોના પર્વ હોળી ધુળેટીના તહેવારના દિવસો નજીક આવી રહ્યાં છે. ત્યારે ડીસા શહેરમાં ઠેર ઠેર ધાણી અને ખજૂરના સ્ટોલ ખડકાઈ ગયા છે. ગત વર્ષ કરતાં ધાણીના ભાવમાં 20 ટકાનો વધારો થયો છે, જ્યારે ખજૂરના ભાવ યથાવત રહ્યા છે.

હોળી ધુળેટીનું પર્વ રાજસ્થાનનો મુખ્ય તહેવાર ગણાય છે. ત્યારે ગુજરાતમાં બનાસકાંઠા જિલ્લો અને તેમાં ખાસ કરીને ડીસા શહેરમાં મોટાભાગના સમાજો મારવાડી સંસ્કૃતિ સાથે જોડાયેલા છે. ડીસામાં હોળી ધુળેટીનો પર્વ રાજસ્થાનની જેમ મુખ્ય તહેવાર તરીકે ખૂબ જ ધામધૂમથી મનાવવામાં આવે છે. ત્યારે ડીસામાં બજારોમાં ઠેર ઠેર ખજૂર અને ધાણીના સ્ટોલ લાગી ગયા છે.

જેમ દિવાળીના પર્વમાં મીઠાઈ મુખ્ય વ્યંજન ગણાય છે, તેમ હોળી ધુળેટીમાં ખજૂર ધાણી અને હારડાનું ખૂબ જ મહત્ત્વ હોય છે. દરેક પરિવારો હોળી ઉપર ખજૂર અને ધાણીની અવશ્ય ખરીદી કરે છે. ત્યારે આ વર્ષે મકાઈ અને જુવારની ધાણીના ભાવમાં ગત વર્ષ કરતાં 20 ટકાનો વધારો થયો છે. ગત વર્ષે 80થી 100 રૂપિયા મળતી ધાણી આ વર્ષે રૂ. 100થી 120 રૂપિયા કિલોના ભાવે વેચાય છે.

જ્યારે અરબસ્તાનમાં ખજૂરનો પાક સારો થયો હોવાથી ખજૂરના ભાવમાં ખાસ કોઈ વધારો થયો નથી. ખજૂર ગત વર્ષે 70થી 80 રૂપિયા કિલો હતી. ત્યારે આ વર્ષે પણ તેના ભાવ યથાવત રહ્યા છે. આમ હોળી ધુળેટીનો પર્વ રંગોની સાથે સાથે ધાણી અને ખજૂર વગર અધુરુ ગણાય છે. આથી હોળી ધૂળેટીના પર્વ પર અનેક પરિવારો ધાણી ખજૂરનો હંગામી વેપાર કરીને પણ પોતાની આજીવિકા રળી લેતા હોય છે.