તાલુકા પંચાયતની બનશે નવી કચેરી:ડીસા તાલુકા પંચાયતનું 85.57 લાખનું બજેટ મંજૂર; સભામાં સખી મંડળોના દબાણનો મુદ્દો પણ ચર્ચાયો

ડીસા તાલુકા પંચાયતની છેલ્લી સામાન્ય સભા અને બજેટ સભા યોજવામાં આવી હતી. જેમાં વર્ષ 2023-24નું રૂપિયા 85.57 લાખની પુરાંતવાળું બજેટ સર્વાનુમતે મંજૂર કરાયું હતું. ડીસા તાલુકા પંચાયતની નવીન કચેરી જૂની જગ્યાએ જ બનાવવાનો પણ ઠરાવ સર્વાનુમતે પસાર કરાયો હતો.

85 લાખનું પુરાંતવાળું બજેટ મંજૂર
ડીસા તાલુકા પંચાયતની મુદ્દત પૂર્ણ થતી હોઈ વર્તમાન બોર્ડની છેલ્લી સામાન્ય સભા અને બજેટ બેઠક તાલુકા પંચાયત પ્રમુખ જીજાબેન બોકરવાડિયાની અધ્યક્ષતામાં યોજાઇ હતી. સભામાં સૌપ્રથમ વર્ષ 2022-23નું સુધારેલું અને વર્ષ 2023-24નું વાર્ષિક અંદાજપત્ર રજૂ કરવામાં આવ્યું હતું. રૂપિયા 85,57,112ની પુરાંતવાળું બજેટ સભ્યોની સંમતિથી મંજૂર કરવામાં આવ્યું હતું. બેઠકમાં મુખ્ય બે મુદ્દા પર ચર્ચા થઈ હતી.

કચેરીના નવીન મકાન માટે અઢી કરોડની ગ્રાન્ટ
ડીસા તાલુકા પંચાયત કચેરીના નવીન મકાન માટે સરકાર દ્વારા રૂપિયા અઢી કરોડની ગ્રાન્ટ ફાળવાયા બાદ નવીન કચેરી હાલની જગ્યાથી ખસેડી ડીસાના ન્યુ ટીસીડી ફાર્મ મેદાન ખાતે બનાવવાનું નક્કી કરાયું હતું. આ બેઠકમાં કારોબારી ચેરમેન એન.સી.ટાંકે રજૂઆત કરી હતી કે, નવીન કચેરી જૂની કચેરી તોડીને તે જ જગ્યા ઉપર બનાવવામાં આવે. નાણાપંચની નવી ગ્રાન્ટ ચાલુ સદસ્યો કહે તે પ્રમાણે તેમની સંમતિથી જ વપરાય તે અંગે પણ તમામ સભ્યોની સંમતિથી ઠરાવ કરવામાં આવ્યો હતો.