સુનાવણી:ઉમરેઠમાં ચેક રીટર્ન ગુનામાં વેપારીને એક વર્ષની સાદી કેદ

ઉમરેઠના હેમરાજપુર ગામમાં હસમુખભાઈ ચૌહાણ રહે છે. તેમની પડોશમાં વિનોદભાઈ મનુભાઈ ચૌહાણ રહે છે. હસમુખભાઈ ખેતીકામ કરી પરિવારનું જીવન ગુજરાન ચલાવે છે. જ્યારે વિનોદભાઈ મરી-મસાલાનો વેપાર કરે છે. તેમના વેપારના વિકાસ માટે અને ધંધામાં ભાગીદારી માટે તેમણે હસમુખભાઈ પાસેથી રૂપિયા બે લાખની માંગ કરી હતી. તેથી હસમુખભાઈએ બેન્કમાંથી લોન લઈ તેમન રૂપિયા બે લાખ આપ્યા હતા. આ રકમ છ માસમાં આપી દેવાની વાત કરી હતી. દરમિયાન, છ માસ બાદ વિનોદભાઈએ બરોડા ગુજરાત ગ્રામીણ બેન્ક, પણસોરા શાખાનો ચેક આપ્યો હતો. જે બેંકમાં રજૂ કરતા બેન્કમાંથી અપૂરતાં ભંડોળના શેરા સાથે પરત ફર્યો હતો. આ અંગે તેમણે ઉમરેઠ કોર્ટમાં ફરિયાદ કરતાં ધી નેગોશિયેબલ ઈન્સ્ટ્રુમેન્ટ એક્ટ અંતર્ગત મેજિસ્ટ્રેટ એસ. એસ. પ્રજાપતિએ આરોપીને તકશીરવાર ઠેરવી એક વર્ષની સાદી કેદ અને ચેકની રકમ વ્યાજ સાથે ચૂકવી આપવા આદેશ કર્યો હતો.