તસ્કરી:ઓડ પે સેન્ટર શાળામાં રૂપિયા 25 હજારની ચોરી, ખંભોળજ પોલીસે ચોરીનો ગુનો નોંધ્યો

આણંદ પાસેના ઓડ ગામે આવેલા પ્રાથમિક પે સેન્ટર શાળામાં ઓરડાનો નકુચો તોડી અજાણ્યા શખ્સો રૂપિયા 25 હજારની કિંમતનું લેપટોપ ચોરી કરી જતાં ખંભોળજ પોલીસે ચોરીનો ગુનો નોંધી તપાસ હાથ ધરી છે. આણંદ તાલુકાના ઓડ ગામે અવસર પાર્ટી પ્લોટ નજીક કલ્પેશકુમાર રમેશચંદ્ર ઠક્કર પરિવાર સાથે રહે છે. તેઓ ઓડ પે સેન્ટર પ્રાથમિક કુમાર શાળામાં આચાર્ય તરીકે નવ વર્ષથી ફરજ બજાવે છે.

ગત 25 મી માર્ચના રોજ ઓડ પે સેન્ટર પ્રાથમિક કુમાર શાળાએ તેઓ ગયા ત્યારે તેમના ઓરડાનો નકુચો તૂટેલી હાલતમાં હતો. જેને પગલે તેઓ ચોંકી ઉઠ્યા હતા. તેમણે તપાસ કરતાં તેમનું રૂપિયા 25 હજારની કિંમતનું લેપટોપ ચોરાયું હોવાનું માલૂમ પડ્યું હતું. આ મામલે તેમણે ખંભોળજ પોલીસ સ્ટેશને ફરિયાદ નોંધાવતા પોલીસે ચોરીનો ગુનો નોંધી તપાસ હાથ ધરી છે.