અજાણ્યા યુવકની હત્યા:નાપાડ-વાંટા હત્યાના બનાવમાં યુવકની ઓળખ હજુ થઈ નથી

આણંદ પાસેના નાપાડ-વાંટા સ્થિત મોટી કેનાલમાંથી પાંચ દિવસ અગાઉ અજાણ્યા યુવકનો હત્યા કરાયેલી હાલતમાં મૃતદેહ મળી આવ્યો હતો. આણંદ ગ્રામ્ય પોલીસે આ મામલે અજાણ્યા શખ્સો વિરૂદ્ધ હત્યાનો ગુનો નોંધી તપાસ હાથ ધરી હતી.

આ અંગે વાત કરતાં આણંદ ગ્રામ્ય પોલીસ સ્ટેશનના પીએસઆઈ નિલેષ રામીએ જણાવ્યું હતું કે, નાપાડ વાંટા ગામ સ્થિત સુલતાનપુરા મોટી કેનાલમાંથી ગત 31મીના રોજ સાંજના સમયે મળી આવેલા યુવકના હત્યા કેસમાં પોલીસ દ્વારા આસપાસના જિલ્લામાં જે ગુમ થયેલા યુવકો છે તેમની યાદી મેળવવાની કામગીરી હાથ ધરાઈ છે.

આ સિવાય, સોશ્યલ મીડિયા પર પણ સતત અપડેટ કરી યુવકના વાલી-વારસની શોધખોળ હાથ ધરાઈ છે. આ ઉપરાંત, શહેર અને ગામડાઓમાં તેના ફોટા સાથેના પોસ્ટર ચોંટાડી તેની ઓળખ મેળવવા પ્રયાસ હાથ ધરાયા છે.