દુખદ:વાસદ ગેટ પાસે STની ટક્કરે કિન્નરનું મોતઃ 1ને ગંભીર ઇજા

નેશનલ હાઈવે આઠ ઉપર વાસદ ગેટ પાસે એસટી બસના ચાલકે સ્ટેયરીંગ પરનો કાબુ ગુમાવતા રોડ પર હાજર રહેલાં બે કિન્નર અને બે કારને અડફેટે લીધા હતા. જેમાં પરીખભુવન ખાતે રહેતા કિન્નરનું મોત નીપજ્યું હતું.

મૂળ રાજસ્થાનના અલવર ગામે રહેતો અને હાલમાં આણંદ પાસેના પરીખભુવન ખાતે રહેતો 25 વર્ષીય ચંદ્રશેખર વિશંભર સૈની છેલ્લા બે મહિનાથી આણંદ પરીખભુવનમાં રહેતો સોનમ માસી દીશાકુંવર ઉર્ફે વિધાનને ત્યાં રહે છે. તે સોનમ માસી સાથે વાસદ ટોલ નાકાએ ભીખ માંગવા જાય છે. તેઓ વાહન ચાલકો પાસે ભીખ માંગી રહ્યા હતા. દરમિયાન તેમની સાથે મોગરના શબનમમાસી પણ આવ્યા હતા અને તેઓ પણ તેમની સાથે ભીખ માંગતા હતા.

સવારે નવ વાગે સોનમમાસી તથા શબનમમાસી વાસદ ગામના ગેટની સામે વડોદરાથી અમદાવાદ હાઈવે પર પૈસા માંગી રહ્યા હતા. એ સમયે અચાનક એક એસટી બસ પુરપાટ ઝડપે આવી ચઢી હતી. અને તેણે બંનેને અડફેટે લીધા હતા. વધુમાં વડોદરા અને સુરત પાસીંગની બે કારને પણ અડફેટે લીધી હતી. પરંતુ કારમાં સવાર કોઈને ઈજા થઈ નહોતી. બસની ટકકરે સોનમમાસીનું ગંભીર ઈજાઓ થવાને કારણે મોત નીપજ્યું હતું. આ અંગે પોલીસે ગુનો નોંધ્યો છે.