વિવાદ:નાવલી ગામે પશુ ચરાવવા બાબતે ઝઘડો, ધમકી આપી, પોલીસે ગુનો નોધી તપાસ હાથ ધરી

આણંદના નાવલી ગામે ખેતરમાં પશુઓ ચરાવી ભેલાણ કરી ખેતર માલિકને લાકડીથી નાક પર ઈજા કરી ગડદાપાટુનો માર મારી ધમકી આપ્યાની ફરિયાદ આણંદ રૂરલ પોલીસ મથકમાં નોંધાઈ છે. નાવલી ગામે પ્રવીણભાઈ પટેલ રહે છે અને ખેતી કરી જીવન ગુજરાન ચલાવે છે. રવિવારે બપોરે પ્રવીણભાઈ પોતાના ખેતરમાં આંટો મારવા ગયા હતા. તે દરમિયાન અંધારીયા ચકલા ગુરુકુળની બાજુમાં રહેતા લાલાભાઇ ભરવાડ, વાલાભાઈ ભરવાડ અને સાજનભાઈ ભરવાડ ખેતરમાં કરેલ ફલાવર અને કોબીઝના પાકમાં પોતાના પશુઓ ચરાવી ભેલાણ કરતા હતા.

જે બાબતે પ્રવિણભાઈએ ઠપકો આપતા ત્રણેય જણાએ ઉશ્કેરાઈ જઈ પ્રવીણભાઈને માર મારી જાનથી મારી નાખવાની ધમકીઓ આપી હતી. આ બનાવ અંગે પ્રવીણભાઈ પટેલે આણંદ ગ્રામ્ય પોલીસ મથકે ત્રણ વિરુદ્ધ ફરિયાદ નોધાવતાં પોલીસ ગુનો નોધી વધુ કાર્યવાહી હાથ ધરી છે.