બંને પક્ષે સામસામે ફરિયાદ:વિરોલમાં જમીનની માપણી અંગે બે સગા ભાઈઓ વચ્ચે મારામારી, ચાર વ્યક્તિઓ સામે ગુનો

પેટલાદ તાલુકાના વિરોલ ગામની ટેકરીયા સીમ વિસ્તારમાં રહેતા મેલાભાઈ પઢીયાર તેમજ તેઓની નજીકમાં જ રહેતા ઉદેશીંગભાઈ પઢીયારની જમીનમાં પ્રાઇવેટ માણસોથી માપણી કરાવેલ જે બાબતે લાલજીભાઈએ લખાણ કરી લેવા જણાવ્યું હતું. પરંતુ અમરસિંગભાઈએ પોતાના ભાગે જમીન ઓછી આવી હોવાનું કહી ફરી જમીન માપણી કરવા જણાવ્યું હતું. આ બાબતની રીસ રાખી ઉદેશીંગભાઈ અને લાલજીભાઈ ઉશ્કેરાઇ જઇ મેલાભાઈ ઉપરાંત તેમના પરિવારજનોને માર મારી તેમજ અમરસિંગભાઈને ચપ્પાથી ઈજાઓ કરી જાનથી મારી નાંખવાની ધમકી આપતા મેલાભાઈની ફરિયાદના આધારે પોલીસે બે વિરુઘ્ધ ગુનો દાખલ કરી આગળની કાર્યવાહી હાથ ધરી છે.

સામા પક્ષે ભાઈલાલભાઈ પઢીયારે નોંધાવેલી ફરિયાદમાં જણાવ્યા મુજબ જમીન માપણી બાબતના ઝગડા બાબતે મેલાભાઈ અને અમરસિંગભાઈ ઉશ્કેરાઇ જઇ ભાઈલાલભાઈ તેમજ તેમના પરિવારજનોને ગડદાપાટુનો માર મારી ડંડાથી ઈજાઓ કરી જાનથી મારી નાખવાની ધમકીઓ આપી હતી. આ અંગે પોલીસે ભાઈલાલભાઈની ફરિયાદ લઈ મેલાભાઈ સહિત બે વિરુઘ્ધ ગુનો દાખલ કરી કાર્યવાહી હાથ ધરી છે.