ખેડૂતો માટે ખુશખબર:ઘઉં, બાજરી, જુવાર, રાગી અને મકાઇની લઘુતમ ટેકાના ભાવથી સીધી ખરીદી કરાશે, 31મી સુધી ઓનલાઇન નોંધણી કરાવી શકશે

ગુજરાતના ખેડૂતોને પાકનો યોગ્ય ભાવ મળી રહે તે માટે રવિ માર્કેટીંગ સીઝન 2023-24 અંતર્ગત રાજય સરકાર દ્વારા ઘઉં, બાજરી, જુવાર, રાગી અને મકાઇની સીધી ખેડૂતો પાસેથી લઘુતમ ટેકાના ભાવે ખરીદી કરવામાં આવશે.

આણંદ જિલ્લામાં જે ખેડૂતો ઘઉં, બાજરી, જુવાર, રાગી કે મકાઇ લઘુતમ ટેકાના ભાવે વેચાણ કરવા ઇચ્છતા હોય તેવા ખેડૂતોએ સ્થાનિક કે ગ્રામ્ય કક્ષાએ VCE દ્વારા તા.31માર્ચ 2023 સુધીમાં ઓનલાઈન નોંધણી કરવામાં આવનાર હોઇ નિયત સમય મર્યાદામાં તેઓનું ઓનલાઇન રજિસ્ટ્રેશન કરાવી લેવા તેમજ રાજ્યમાં ઘઉં પકવતા જે પણ ખેડૂતો લઘુતમ ટેકાના ભાવે વેચાણ કરવા ઈચ્છુક હોય તેઓની ઓનલાઇન નોંધણી ફરજીયાત હોઈ આ માટે સંબંધિત ગ્રામપંચાયતનો સંપર્ક કરી નોંધણી કરાવવા આણંદના ગુજરાત રાજય નાગરિક પુરવઠા નિગમ લિ.ના નાયબ જિલ્લા મેનેજર દ્વારા જણાવાયુ છે.

આ ઉપરાંત તેમણે વધુમાં જણાવ્યું હતું કે, આ નોંધણી માટે જરૂરી પુરાવાઓ જેવાં કે, આધારકાર્ડની નકલ, 7/12નો અદ્યતન નમૂનો, 8-અની નકલ, નમુના-12માં પાક વાવણી અંગેની એન્ટ્રી ના થઇ હોય તો પાક વાવ્યા અંગેનો તલાટીના સહી-સિકકા સાથેનો દાખલો, પોતાના (ખેડૂતના) બેન્ક એકાઉન્ટની પાસબુકની નકલ અથવા કેન્સલ ચેકની નકલ (IFSC કોડ સહિતનો) સાથે લઇ જવાનું તેમજ ખરીદી સમયે ખેડૂતે પોતાનું આધારકાર્ડ ઓળખપત્ર સાથે રાખવાનું રહેશે. તેમજ ખેડુત ખાતેદારના બાયોમેટ્રિક ઓથેન્ટીકેશન દ્વારા જ જથ્થો ખરીદ કરવામાં આવશે.

મહત્વનું છે કે ખેડૂતોએ ઓનલાઇન નોંધણી કરાવતી વખતે તમામ ડોકયુમેન્ટસ સુવ્યવ્સ્થિત રીતે અપલોડ થાય તથા માગ્યા મુજબના જ ડોક્યુમેન્ટસ અપલોડ થાય તેની તકેદારી નોંધણી સ્થળ,કાઉન્ટર છોડતા પહેલા રાખવાની રહેશે. ડોકયુમેન્ટસની ચકાસણી દરમિયાન ખોટા ડોક્યુમેન્ટસ અપલોડ કરાયા હોવાનું ધ્યાને આવતા જે-તે ક્રમ આવતો હશે તે આપો-આપ રદ થશે અને ખરીદી માટે જાણ કરવામાં નહી આવે તેની ખાસ નોંધ લેવા તેમજ ખેડૂતોને રજિસ્ટ્રેશન માટે કોઇ મુશ્કેલી જણાય તો હેલ્પ લાઇન નંબર 8511171718 તથા 8511171719 ઉપર સંપર્ક કરવા જણાવાયું છે.