ક્રાઇમ:ઝારોલામાં તબીબે પરણિતાની જાતીય સતામણી કરતા ફરિયાદ

બોરસદ તાલુકાના ઝારોલામાં રહેતી પરણિતાની તબીબે જાતીય સતામણી કરતાં સમગ્ર મામલો ભાદરણ પોલીસ સ્ટેશને પહોંચ્યો હતો. પોલીસ દ્વારા આ મામલે ગુનો નોંધી તબીબના ધરપકડના ચક્રો ગતિમાન કર્યા છે. ઝારોલામાં રહેતી 33 વર્ષીય પરણિતાએ આ મામલે ભાદરણ પોલીસ સ્ટેશને નોંધાવેલી ફરિયાદમાં જણાવ્યું હતું કે, રાસ ગામે રહેતા તબીબ બ્રિજેશભાઈ કે. સાવજ (પટેલ) તેણીના પિતા અને ભાઈના મિત્ર થતા હોય તેણીના ઘરે અવર-જવર કરતા હતા. જેને પગલે પરણિતા તેમને સારી રીતે ઓળખતી હતી. પિતા સમાન તેમને માન આપતી હતી.

દરમિયાન ગત 27મીના રોજ બપોરે સાડા ત્રણ વાગ્યે પરણિતા તેમના ઘરે એકલાં હતા. એ સમયે અચાનક બ્રિજેશભાઈ તેમના ઘરે આવ્યા હતા. અને તેમના ઘરમાં થોડો સમય બેઠા હતા. દરમિયાન એ સમયે બ્રિજેશભાઈએ પરણિતાની એકલતાનો લાભ લઈ તેને તને ઈચ્છા નથી થતી મારી પાસે આવવાની તેમ જણાવ્યું હતું. જેને પગલે પરણિતા ક્ષોભજનક સ્થિતિમાં મુકાઈ ગઈ હતી. તેણે તેને કંઈ પ્રત્યુતર આપ્યો નહોતો. બાદમાં પરિવારજનોની સમજાવટ બાદ તેણીએ ભાદરણ પોલીસ સ્ટેશને તબીબ વિરૂદ્ધ ફરિયાદ નોંધાવતા પોલીસે ગુનો નોંધી તબીબની ધરપકડના ચક્રો ગતિમાન કર્યા છે.