ઉજવણી:દેશમાં કોરોના રસીકરણના ડોઝનો આંકડો 100 કરોડને પાર થતાં આણંદ જિલ્લામાં 100 ફુગ્ગા ઉડાડીને ઉજવણી કરાઈ

આણંદએક મહિનો પહેલા
  • કૉપી લિંક
  • આંકલાવ અને બોરસદમાં 100 ટકા કોરોના વિરોધી રસીકરણ પૂર્ણ
  • જિલ્લામાં અત્યાર સુધીમાં પ્રથમ ડોઝમાં 97.58 અને બીજા ડોઝમાં 97.27 ટકા કામગીરી પૂર્ણ કરાઇ

દેશમાં કોરોના રસીકરણના ડોઝનો આંકડો 100 કરોડને પાર થતાં આણંદ જિલ્લામાં ઉજવણી કરવામાં આવી હતી. જિલ્‍લા વિકાસ અધિકારી બી.જી.પ્રજાપતિ, જિલ્‍લા પંચાયતની આરોગ્‍ય સમિતિના ચેરમેન, મુખ્‍ય જિલ્‍લા આરોગ્‍ય અધિકારી ડો. એમ. ટી. છારી સહિત ઉપસ્‍થિત આશાવર્કર બહેનો અને ફીમેલ-મેલ હેલ્‍થ વર્કરોએ ગગનમાં 100 ફુગ્‍ગા ઉડાડીને ખુશાલી વ્‍યકત કરી હતી.

આણંદ જિલ્લામાં પ્રથમ ડોઝમાં 15.09 લાખની પાત્રતા ધરાવતા નાગરિકોમાંથી આશરે 14.72 લાખ નાગરિકોનું રસીકરણ કરવામાં આવ્યું છે. જે કુલ ટકાવારીના 97.58 સિદ્ધિ દર્શાવે છે. જયારે 36,514 નાગરિકો બાકી છે. જ્યારે બીજા ડોઝમાં 9.01 લાખ પાત્રતા ધરાવતા નાગરિકોમાંથી 8.77 લાખ નાગરિકોનું રસીકરણ કરાયું છે. જે કુલ ટકાવારીના 97.27 ટકા સિદ્ધિ દર્શાવે છે. જે મુજબ જિલ્લામાં કુલ 23.49 લાખ નાગરિકોને કોરોના રસી આપવામાં આવી છે. આ ઉપરાંત જિલ્લાના 8 તાલુકા પૈકી આંકલાવ અને બોરસદમાં 100 ટકા રસીકરણની કામગીરી પૂર્ણ થઈ છે. તેમાંય જિલ્‍લાના 351 ગામો પૈકી 276 ગામો પણ 100 ટકા રસીકરણ થઇ ગયું હતું.

આ સફળતાની ઉજવણી અંતર્ગત ગુરૂવારના રોજ જિલ્‍લા પંચાયત ખાતે જિલ્‍લા વિકાસ અધિકારી બી. જી. પ્રજાપતિએ કોરોનાના આ કપરા કાળમાં આરોગ્‍ય કર્મયોગીઓએ હિંમત બતાવીને કોઇપણ જાતની રજા મૂકયા સિવાય સતત રાત-દિવસ નાગરિકોના આરોગ્‍યની સેવામાં કાર્યરત રહીને ફરજો બજાવી હતી. તેવી જ રીતે નાગરિકોની સુરક્ષા માટે વેક્સિનની કામગીરી કરીને આજે રાષ્‍ટ્રને જે અભૂતપૂર્વ સિદ્ધિ હાંસલ કરવામાં પોતાની ભૂમિકા અદા કરી છે, તેને બિરદાવી અભિનંદન પાઠવ્‍યાં હતા. આ ઉપરાંત હજુ પણ જે નાગરિકોએ રસી મૂકાવી નથી, તેવા નાગરિકોનો સંપર્ક કરી રસી મૂકવાની કામગીરી આગામી દિવસોમાં કરવામાં આવશે તેમ ઉમેર્યું હતું.

રસીકરણની રાષ્‍ટ્રીય સિદ્ધિની હર્ષોલ્‍લાસથી ઉજવણી

આ પ્રસંગે 100 કરોડના રસીકરણની રાષ્‍ટ્રીય સિદ્ધિ નિમિત્તે 30 આરોગ્‍ય કર્મયોગીઓને જિલ્‍લા વિકાસ અધિકારી બી. જી. પ્રજાપતિ, જિલ્‍લા પંચાયતની આરોગ્‍ય સમિતિના ચેરમેનના હસ્‍તે પ્રશસ્‍તિપત્ર એનાયત કરી સન્‍માનિત કરવામાં આવ્‍યાં હતા. જ્યારે જિલ્‍લા મેલેરિયા અધિકારી ડો. આલોક કુલશ્રેષ્‍ઠ, આંકલાવના તાલુકા આરોગ્‍ય અધિકારી સહિત આરોગ્‍ય કર્મચારીઓએ હાજર રહીને 100 કરોડના રસીકરણની રાષ્‍ટ્રીય સિદ્ધિની હર્ષોલ્‍લાસથી ઉજવણી કરી હતી.

31 પ્રાથમિક આરોગ્ય કેન્દ્રમાં 100 ટકા કામગીરી થઇ

આ અંગે મુખ્‍ય જિલ્‍લા આરોગ્‍ય અધિકારી ડો. એમ. ટી. છારીએ જણાવ્યું હતું કે, હાલ જિલ્‍લામાં 53 પ્રાથમિક આરોગ્‍ય કેન્‍દ્ર પૈકી 31 પ્રાથમિક આરોગ્‍ય કેન્‍દ્રોમાં 100 ટકા રસીકરણની કામગીરી થઇ ગઇ છે. જયારે હાલ જિલ્‍લામાં 212 રસીકરણ કેન્‍દ્રો કાર્યરત છે. જિલ્‍લાના અંદાજે અઢી હજારથી વધુ તમામ આરોગ્‍ય કર્મયોગીઓ વૈશ્વિક મહામારીના કોરોના કપરા કાળમાં તેમજ વેક્સિનેશનની કામગીરીમાં રાત દિવસ જોયા વગર કામ કર્યુ છે. તેવા તમામ આરોગ્‍ય કર્મયોગીઓનું આગામી દિવસોમાં પ્રશસ્‍તિપત્ર એનાયત કરી સન્‍માનિત કરવામાં આવશે.

જિલ્લામાં કોરોનાનો પુનઃ પગપેસારો

આણંદ જિલ્લામાં કોરોના સંક્રમિત દર્દીની સંખ્યા શૂન્ય થઈ ગઈ હતી. કોરોના જિલ્લામાં વિદાય લીધી હોય તેમ જણાઇ રહ્યું હતું. ગણેશ ચતુર્થી અને નવરાત્રિ બન્ને તહેવારો કોરોનાની અડચણ વિના પાર થયા હતા. જોકે, દિવાળી ટાણે આણંદ અને પેટલાદમાં બે કોરોના સંક્રમિત દર્દીઓ નોંધાયા હતાં. જેના પગલે જિલ્લામાં ફરી કોરોનાનો ફફડાટ ઉભો થયો છે.

અન્ય સમાચારો પણ છે...