ગુજરાતમાં હોળી ટાણે જ વરસાદ:રાજ્યના વાતાવરણમાં સતત ત્રીજા દિવસે પલટો, અમરેલીમાં ભરઉનાળે નદીઓમાં પૂર; અમદાવાદમાં ભારે પવન સાથે વરસાદ

ગુજરાતમાં આજે હોળી પ્રગટાવવાના સમય પહેલાં જ અલગ અલગ શહેરોમાં ભારે પવન અને ગાજવીજ સાથે વરસાદ વરસતાં હોળીના આયોજનના રંગમાં ભંગ પડ્યો હતો. આજે સૌરાષ્ટ્ર, દક્ષિણ ગુજરાત અને ઉત્તર ગુજરાતના જિલ્લાઓમાં કમોસમી વરસાદ વરસ્યો હતો. કેટલાક જિલ્લાઓમાં કરા અને ભારે પવન સાથે વરસાદ વરસતાં અષાઢ મહિના જેવો માહોલ જોવા મળ્યો હતો. માવઠાને કારણે કેરી અને રવી પાકને નુકસાન થવાની ભીતિ સેવાઈ રહી છે.

અમરેલીમાં સતત ત્રીજા દિવસે કમોસમી વરસાદી કહેર
અમરેલી જિલ્લામાં હવામાન વિભાગની આગાહી મુજબ, આજે સતત ત્રીજા દિવસે પણ કમોસમી વરસાદ વરસ્યો હતો. આજે ધારી, સાવરકુંડલા, દામનગર, લાઠી અને અમરેલીમાં કરા સાથે કમોસમી વરસાદ વરસ્યો હતો. અમરેલી જિલ્લામાં વાતાવરણમાં પલટાના કારણે કેરી સહિતના પાકને નુકસાન થવાની ભીતિ સેવાઈ રહી છે.

અમરેલીમાં ભરઉનાળે નદી બે કાંઠે વહેતી થઈ
અમરેલીના ધારી તાલુકામાં ભારે પવન સાથે ધોધમાર વરસાદ વરસતાં શેત્રુંજી નદી બે કાંઠે વહેતી થઈ હતી. મીઠાપુર, દલખાણિયા, કુબડા કોટડા, પાણિયા, ચાંચઈ, ગીગાસણ, ગોવિંદપુર, ફાચરિયા, સરસિયા, જીરાખીસરી સહિતનાં ગામોમાં ધોધમાર વરસાદ વરસ્યો હતો. ધારીના ચાચઈ ગામે ભારે પવન સાથે વરસાદ પડતાં ખેતીના પાકને ભારે નુકસાનીનાં દૃશ્યો જોવા મળ્યાં હતાં.

અમદાવાદમાં ભારે પવન સાથે વરસાદ વરસ્યો
અમદાવાદમાં હોલિકાદહનના એક કલાક પહેલાં જ વાતાવરણમાં પલટો આવ્યો હતો. અચાનક જ ભારે પવન ફૂંકાવાનો શરૂ થયો હતો. ધૂળની ડમરીઓ સાથે ભારે પવન ફૂંકાતાં વાહનચાલકોને રોડ પર વાહન ચલાવવામાં મુશ્કેલી પડી હતી. લાઈટ ચાલુ રાખી અને વાહન ચલાવવું પડ્યું હતું, જ્યારે ટૂ-વ્હીલરચાલકોએ તો રોડની સાઈડમાં થોડી જ વાર ઊભા રહી જવાની ફરજ પડી હતી. ઠંડા પવન સાથે ધૂળની ડમરીઓ ઊડી હતી, જેને કારણે કેટલીક જગ્યાએ તો હોલિકાદહન માટેની તૈયારી પર પાણી ફરી ગયું હતું.

વડોદરામાં ભારે પવનને કારણે વૃક્ષો જમીનદોસ્ત થયાં
વડોદરા શહરેના વાતાવરણમાં સાંજે પલટો આવ્યો હતો અને પવન ફૂંકાતાં જુદા જુદા ત્રણ વિસ્તારોમાં ઝાડ પડ્યાના બનાવો બન્યા હતા. હોળી પ્રગટાવવાને માંડ બે કલાક જેટલો સમય રહ્યો હતો ત્યાં જ વડોદરા શહેરના હવામાનમાં અચાનક પલટો આવ્યો હતો. સાંજે જોરદાર પવન ફૂંકાતાં વાહનચાલકો અને રાહદારીઓને હાલાકીનો સામનો કરવો પડ્યો. તો બીજી તરફ શહેરના વાઘોડિયા રોડ, લહેરીપુરા પદ્યામતી શોપિંગ સેન્ટર પાસે અને રાજમહેલ રોડ વિજય ફરસાણની દુકાન પાસે ઝાડ પડ્યાના ફાયરબ્રિગેડને કોલ મળ્યા હતા. એક તરફ ખરા ઉનાળાની શરૂઆત થઇ રહી છે ત્યારે જ રાજ્યમાં સૌરાષ્ટ્ર સહિતના વિસ્તારોમાં પણ હવામાન પલટાયું છે, જેને કારણે ઘઉં, ચણા અને કેરીના પાકને નુકસાન થવાની ભીતિ વર્તાઈ રહી છે.

પાટણના શંખેશ્વરમાં કરા સાથે વરસાદ
ગુજરાતમાં એક તરફ આકરી ગરમીની શરૂઆત થઈ ચૂકી છે, તો બીજી તરફ પાટણના શંખેશ્વરમાં કાલે બપોરના સમયે કરા સાથે વરસાદ વરસવાની શરૂઆત થઈ હતી. ભારે પવન સાથે વરસાદ વરસતાં ધરતીપુત્રો ચિંતિત બન્યા છે.

બનાસકાંઠામાં ધરતીપુત્રોની ચિંતા વધી
બનાસકાંઠાના ધાનેરામાં આજે બપોરના સમયે વાતાવરણમાં પલટો જોવા મળ્યો હતો. ધાનેરાના બોર્ડર વિસ્તારના બાપલા, વાછોલ, કુંડી સહિતનાં ગામોમાં ભારે પવન સાથે કમોસમી વરસાદ વરસ્યો હતો. માવઠાના કારણે રાયડો, ઘઉં, બટાટા અને રાજગરા સહિતના પાકને નુકસાન થવાની ભીતિ સેવાઈ રહી છે.

દમણમાં હોળીનાં છાણાં-લાકડાં ઢાંકવા પડ્યાં
આજે હોળી હોવાના કારણે મોટા ભાગના વિસ્તારમાં હોળીદહનની તૈયારીઓ કરી લેવામાં આવી છે. ત્યારે સંઘપ્રદેશ દમણમાં પણ કમોસમી વરસાદ વરસતાં લોકોને હોળીનાં લાકડાં અને છાણાં ઢાંકવા પડ્યા હતા. સંઘપ્રદેશ દમણ ઉપરાંત વલસાડ અને ઉમરગામમમાં કમોસમી વરસાદ વરસ્યો હતો.

ગુજરાતમાં આજે નવસારીના ચીખલી તાલુકામાં, સુરેન્દ્રનગરના પાટડી તાલુકામાં અને કચ્છના આહીર પટ્ટીનાં ગામોમાં પણ માવઠું થયું છે. આ જિલ્લામાં ક્યાંક ભારે પવન સાથે અને ક્યાંક કરા સાથે કમોસમી વરસાદ વરસ્યો છે. રાજ્યમાં હવામાન વિભાગની આગાહીને પગલે એલર્ટ કરાતા ખુલ્લામાં પડેલા અનાજનું નુકસાન તો ટાળી શકાયું છે, પરંતુ ખેતરોમાં ઊભા પાકને માઠી અસર થવાની ભીતિ વ્યકત કરવામાં આવી રહી છે, જેને કારણે ધરતીપુત્રો ચિંતિત બન્યા છે.

દક્ષિણ ગુજરાતના ખેડૂતોને ઊભા પાકની ચિંતા
હવામાન વિભાગની આગાહી પ્રમાણે, સુરતના વાતાવરણમાં પલટો જોવા મળી રહ્યો છે. વહેલી સવારથી જ સુરત વાદળાઓથી ઘેરાયેલું હતું અને બફારો થતો હતો. વાતાવરણમાં આવેલા પલટાને કારણે વરસાદ આવે એવી શક્યતા વર્તાઈ રહી હતી અને આખરે બપોર થતાંની સાથે જ વરસાદ શરૂ થઈ ગયો હતો, જેથી ખેડૂતોને ઊભા પાકને લઈને ચિંતા સતાવી રહી છે. કેરીના મોર સહિતના ઘઉં, ચણાના પાકને નુકસાન થવાની ભીતિ છે. બીજી તરફ હોળિકાદહન પૂર્વ વરસાદ વરસતાં હોળીની તૈયારીમાં વિધ્ન આવવાની સાથે પ્લાસ્ટિકના કવર કે છત્રીથી હોળીને ઢાંકવાની ફરજ પડી હતી.

અંકલેશ્વરમાં મિની વાવાઝોડા જેવાં દૃશ્યો સર્જાયાં
અંકલેશ્વર પંથકમાં હોળીના દિવસે વાતાવરણમાં પલટા વચ્ચે વાવાઝોડા સાથે પવન ફૂંકાતાં ઠેર-ઠેર વંટોળિયા જેવાં દૃશ્યો જોવા મળ્યાં હતાં. મહત્તમ તાપમાન નીચે સરકતાં ગરમીમાં આંશિક રાહત વચ્ચે ચાલીસથી પચાસ કિમીની ઝડપે પવન ફુંકાયો હતો. શહેરમાં ફૂંકાયેલા વાવાઝોડાની સાથે આકાશમાં વાદળો સાથે અમુક વિસ્તારોમાં વરસાદ પણ વરસ્યો હતો તેમજ ઠેર-ઠેર પાંદડાં, કચરા વગેરેની ડમરી ઊડી હતી, જેના કારણે રાહદારીઓ, વાહનચાલકો ઉપરાંત દુકાનદારોએ પણ હાલાકી અનુભવી હતી. ભારે પવનની સાથે અમુક વિસ્તારોમાં વરસાદ પણ વરસતાં મહત્તમ તાપમાન પણ ઘટતાં લોકોએ ગરમીથી આંશિક રાહતનો અહેસાસ કર્યો હતો. જ્યારે ભારે પવનના કારણે વીજપુરવઠો પણ ખોરવાયો હતો. કેટલાંય સ્થળોએ સંચાલકો દ્વારા તૈયાર કરેલી હોળી સાચવવા માટે દોડધામ મચી ગઇ હતી.

નડિયાદમાં ભારે પવન ફૂંકાયો
પલટાયેલા વાતાવરણના કારણે નડિયાદમાં સોમવારની સાંજે ભારે પવન ફૂંકાયો હતો, જેને કારણે રોડ પર ધૂળની ડમરીઓ ઊડવા લાગી હતી. ખાસ કરીને એક બાજુ હોળીની તૈયારીઓ ચાલતી હતી, આ વેળાએ જ ભારે પવન સાથે વાવાઝોડું ફૂંકાયું હતું, આથી હોળીનું આયોજન કરનારને થોડા સમય માટે વિક્ષેપ પડ્યો હતો. ભારે પવન ફૂંકાતાં વાહનચાલકોને ભારે હાડમારી વેઠવી પડી હતી. નોંધનીય છે કે ગતરાત્રે જ ગાજવીજ કડાકા સાથે વરસાદી ઝાપટાં પડ્યાં હતાં. આવા વાતાવરણથી જિલ્લાના ખેડૂતોમાં ચિંતા પ્રસરી જવા પામી છે.

રાજકોટમાં સતત બીજા દિવસે માવઠું થયું
ગુજરાતમાં માવઠાની આગાહી બાદ વાતાવરણમાં પલટો જોવા મળ્યો હતો. બે દિવસથી બેવડી ઋતુનો અનુભવ થઈ રહ્યો છે. ત્યારે હવામાન વિભાગની આગાહી અનુસાર, રાજકોટ જિલ્લામાં સતત બીજે દિવસે કમોસમી વરસાદ પડ્યો હતો. શહેરના કાલાવડ રોડ અને લક્ષ્મીનગરમાં કરા સાથે વરસાદ વરસ્યો હતો. નોંધનીય છે કે હોલિકાદહન પૂર્વે વરસાદનું વિઘ્ન સામે આવ્યું છે. ત્યારે શહેરના જંક્શન વિસ્તારમાં હોલિકાદહનનું આયોજન કરનાર ગ્રુપ દ્વારા તાલપત્રીથી હોળી ઢાંકવામાં આવી હતી, જ્યારે પડધરીમાં કમોસમી વરસાદથી ચણાના પાથરા પલળ્યા હતા.

અમરેલીમાં વીજળી પડતાં ઓરડીમાં આગ
અમરેલીમાં આજે કમોસમી વરસાદ વચ્ચે સાવરકુંડલાના વાંશિયાળી ગામની સીમમાં વીજળી ત્રાટકી હતી. અહીં ખેતરમાં રહેતા ખેતમજૂરની ઓરડી પર વીજળી પડતાં આગ ફાટી નીકળી હતી. આગમાં ખેતમજૂરનાં કપડાં સહિતની ઘરવખરી બળીને ખાખ થઈ હતી. સદભાગ્યે ખેતમજૂરનો પરિવાર ઓરડીમાં હાજર ન હોવાને કારણે જાનહાનિ થતાં અટકી હતી.