સેવા:રાજુલાથી ભુજ સુધીની એસટી સ્લીપર બસ સેવા શરૂ કરાઇ

રાજુલાથી ભુજ વચ્ચે સ્લીપર બસ સેવા શરૂ કરવામાં આવી છે. અહીં રાત્રે 8 કલાકે રાજુલાના ડેપો મેનેજર નિમિષાબેન ગઢવીએ લીલી ઝંડી આપી બસને રવાના કરી હતી. વેપારીઓની વર્ષો જૂની માંગણી સંતોષાતા ખુશીનો માહોલ સવાયો હતો. રાજુલા ચેમ્બર ઓફ કોમર્સના પ્રમુખ બકુલભાઈ વોરાએ રાજુલા થી ભુજ વચ્ચે સ્લીપર બસ સેવા શરૂ કરવા એસટીના વિભાગીય નિયામક ચારોલાને રજૂઆત કરી હતી.

જેને ધ્યાને રાખીને અમરેલી એસટી ડિવિઝન દ્વારા રાજુલા ડેપોમાંથી સાંજે 8 વાગ્યાની સ્લીપર બસ સેવા શરૂ કરવામાં આવી છે. આ બસ ભુજ ડેપોમાંથી સવારે 6 કલાકે અમરેલી તરફ આવવા રવાના થશે. રાજુલા - ભુજ વચ્ચે શરૂ થયેલી બસ સેવાને ડેપો મેનેજર નિમિષાબેન ગઢવીએ લીલી ઝંડી આપી પ્રસ્થાન કરાવ્યું હતું. આ તકે રાજુલા ડેપોના સૈયદભાઈ, ભરતભાઇ વરૂ, પ્રતાપભાઈ, ચંપુભાઈ, કશુભાઈ ધાખડા અને વી.વી.જોષી વિગેરે ઉપસ્થિત રહ્યા હતા.