શિકાર:કાતર ગામની બજારમાં મધરાતે બે સાવજે વાછરડીનું મારણ કર્યું

રાજુલા તાલુકાના કાતર ગામમાં સાવજો જાણે હળી ગયા છે. જયારે પણ ભુખ લાગે ત્યારે આ સાવજો મારણની શોધમાં ગામમાં આવી ચડે છે. ગઈ મધરાતે બે સાવજોએ ગામની બજારમાં ઘુસી એક વાછરડીનું મારણ કર્યું હતું.

અમરેલી જિલ્લાના રેવન્યુ વિસ્તારમાં વસતા સાવજો કોઈ ગામમાં ઘુસી જાય તે વાતની હવે નવાઇ રહી નથી. પરંતુ રાજુલા તાલુકાના કાતર ગામમાં તો સાવજોના કાયમી ધામા હોય છે. રાત પડતા જ અવાર નવાર સાવજો ગામની બજારમાં આંટો મારવા લાગે છે. પાછલા એક મહિના દરમિયાન આવા દ્રશ્યો અવાર-નવાર જોવા મળ્યા છે. ત્યારે ગઇરાત્રે વધુ એક વખત આવું જ દ્રશ્ય સામે આવ્યું હતું.

પેટની ભૂખ ભાંગવા માટે બે સાવજો અડધી રાત થતાં જ ગામની બજારમાં ઘૂસી આવ્યા હતા. સાવજનું આગમન થતાં જ શહેરની બજારોમાં રખડતા ઢોર આમથી તેમ ભાગવા લાગ્યા હતા. જે દ્રશ્યો સીસીટીવીમાં પણ કેદ થયા હતા. અને એક સ્થળે સાવજે વાછરડીને ગળેથી પકડી ગણતરીના સમયમાં જ તેના રામ રમાડી દીધા હતા. ભૂતકાળમાં પણ ગામમાં સાવજોની અવરજવર સીસીટીવીમાં કેદ થઈ હતી. ગામ લોકોને સૌથી મોટો ડર સાવજો માણસ પર હુમલો કરી બેસે તેનો છે.