ધરપકડ:જિલ્લામાં 47 શખ્સો નશો કરેલી હાલતમાં ઝડપાયા

અમરેલી જિલ્લામા દારૂનુ વેચાણ, હેરાફેરી તેમજ નશાખોરીની પ્રવૃતિને ડામવા પોલીસ દ્વારા કડક કાર્યવાહી કરવામા આવી રહી છે. ત્યારે પોલીસે જિલ્લામા 47 શખ્સોને નશો કરેલી હાલતમા ઝડપી પાડયા હતા. જયારે જુદાજુદા 6 સ્થળેથી દેશીદારૂ પણ ઝડપી લઇ ધોરણસરની કાર્યવાહી હાથ ધરી હતી. જિલ્લામા પોલીસે 31 ડિસેમ્બર પહેલા જ નશાખોરો, દારૂની હેરફેર કરનારા તત્વો સામે કાર્યવાહી શરૂ કરી દીધી છે. પોલીસે જિલ્લામા વધારાની ચેકપોસ્ટ પણ ઉભી કરી છે. ત્યારે પોલીસે જાફરાબાદ, દામનગર, લાઠી, ચલાલા, અમરાપરા, વિરડી, બગસરા, જીંજકા, મોણપુર, અમરેલી, મીઠાપુર, ટીંબી ચેકપોસ્ટ, દુધાળા ચેકપોસ્ટ, ધારી, બાબરીયાધાર, ભોરીંગડા, લીલીયા, પચપચીયા વિગેરે ગામોમાથી 47 શખ્સોને નશો કરેલી હાલતમા ઝડપી લીધા હતા. આ ઉપરાંત પોલીસે લાઠી, અકાળા, ભુરખીયા, ઉંટવડ, સોનારીયા, અમરેલી વિગેરે સ્થળેથી દેશીદારૂ પણ કબજે લીધો હતો.