પંચાયત ચૂંટણી 2021:કરિયાણા, ખંભાળા તાલુકા પંચાયત સીટ ભાજપને બિનહરીફ મળી ગઇ

પાલિકા અને પંચાયતની ચૂંટણી માટે આજે ફોર્મ પરત ખેંચવાનો દિવસ હતો. ત્યારે ભારતીય જનતા પાર્ટીને બાબરા તાલુકા પંચાયતની કરિયાણા અને ખંભાળા બેઠક બિન હરીફ મળી હતી. ખંભાળામાં કોંગી ઉમેદવારે ફોર્મ પરત ખેંચ્યું હતું. જ્યારે કરિયાણામાં ભાજપના એકમાત્ર ઉમેદવાર છે. આજે જિલ્લા પંચાયતમાં બે તથા તાલુકા પંચાયતો અને પાંચ પાલિકામાં 17-17 ફોર્મ પરત ખેંચાયા હતા. અમરેલી જિલ્લામાં નગરપાલિકા અને પંચાયતોમાં કેટલા ઉમેદવારો વચ્ચે ચૂંટણી યોજાશે તે ચિત્ર આજે સ્પષ્ટ થઈ ગયું હતું. આજે ફોર્મ પરત ખેંચવાનો દિવસ હતો. જે દરમિયાન જિલ્લા પંચાયતમાંથી બે ફોર્મ પરત ખેંચાયા હતા.

જ્યારે અમરેલી જિલ્લાની 11 તાલુકા પંચાયતમાંથી 17 ફોર્મ પરત ખેંચાયા હતા. 5 નગરપાલિકામાંથી પણ 17 ફોર્મ પરત ખેંચાયા હતા. આમ હવે નગર પાલિકામાં કુલ 459 ઉમેદવારો વચ્ચે સીધો જંગ જામશે. જ્યારે 11 તાલુકા પંચાયતોમાં 515 ઉમેદવારો વચ્ચે ચૂંટણી યોજાશે. જિલ્લા પંચાયતની 34 સીટ માટે 91 ઉમેદવારો વચ્ચે ચૂંટણી થશે.દરમિયાન ફોર્મ પરત ખેંચવાની પ્રક્રિયા પૂર્ણ થતાં સુધીમાં ભારતીય જનતા પાર્ટીને બાબરા તાલુકા પંચાયતની બે બેઠક બિનહરીફ મળી ગઈ છે. અહીંની કરિયાણા સીટ પર એકમાત્ર ભાજપના ઉમેદવારે જ ફોર્મ ભર્યું છે.

જેના પગલે આજે આ સીટ ભાજપને બિનહરીફ મળી હતી. આ ઉપરાંત બાબરા તાલુકા પંચાયતની ખંભાળા સીટ પર ભાજપ અને કોંગ્રેસના બે ઉમેદવારના ફોર્મ ભરાયા હતા. જે પૈકી કોંગ્રેસના ઉમેદવારે આજે ફોર્મ પરત ખેંચી લેતા આ સીટ પણ ભાજપને બિનહરીફ મળી છે. આમ 18 સીટની તાલુકા પંચાયતમાંથી ભાજપને બે સીટ મળી ચૂકી છે.

અમરેલી નગરપાલિકામાંથી 4, બગસરા પાલિકામાંથી 4, સાવરકુંડલા પાલિકામાં 6, બાબરા પાલિકામાં 1 અને દામનગર પાલિકામાં 2 ફોર્મ પરત ખેંચાયા હતા. જિલ્લાની 5 પાલિકા, તમામ તાલુકા પંચાયત અને જિલ્લા પંચાયતમાં ભાજપ અને કોંગ્રેસ વચ્ચે સીધો જંગ છે. હાલમાં સૌથી વધુ ઉમેદવાર અમરેલી નગરપાલિકામાં 129 છે. આ ઉપરાંત સાવરકુંડલા નગરપાલિકામાં પણ 105 ઉમેદવાર વચ્ચે જંગ થશે.