ગંદકીના ગંજ:અમરેલીના જિલ્લા પંચાયત રોડ પર અનાજ ગોડાઉન પાસે ગંદકીના ગંજ

અમરેલીના જિલ્લા પંચાયત રોડ પર આવેલ અનાજના ગોડાઉન પાસે ગંદકીના ઢગ સર્જાયા છે. અહીં પાલિકા સ્વચ્છતા અભિયાનના લીરેલીરા ઉડાવી રહી છે. ત્યારે વહેલી તકે અહીં યોગ્ય સફાઈ કરવા વેપારીઓમાં માંગ ઉઠી છે.અમરેલી શહેરમાં સફાઈનો પ્રશ્ન લોકોના માથાના દુ: ખાવા સમાન બન્યો છે. શહેરની સોસાયટીઓની સાથે સાથે મુખ્ય માર્ગો પર ચારેતરફ ગંદકી જ નજરે ચડે છે.

જેના કારણે સ્થાનિક લોકોની સાથે સાથે વેપારીઓ પણ પરેશાન બન્યા છે. ત્યારે શહેરના જિલ્લા પંચાયત રોડ પર આવેલ ગુજરાત રાજ્ય નાગરિક પુરવઠા વિભાગના અનાજ ગોડાઉનની દીવાલ પાસે લાંબા સમયથી ગંદકીના ઢગ સર્જાયા છે ઉપરાંત ગંદકીના કારણે અત્યંત ખરાબ દુર્ગંધ ફેલાતા સ્થાનિક દુકાન ધારકો મુશ્કેલીમાં મુકાયા છે. સાથે સાથે મચ્છરનો ઉપદ્રવ વધી ગયો છે. તેવા સમયે નગરપાલિકા દ્વારા વહેલી તકે યોગ્ય સફાઈ કરવામાં આવે તેવી વેપારીઓમાં માંગ ઉઠી છે.