ધરપકડ:રાજકોટ પંથકમાંથી 7 મોબાઇલની ચોરી કરનાર એક શખ્સ ઝડપાયો

લાઠી પોલીસ દ્વારા કચ્છ જિલ્લાના ભચાઉ તાલુકાના સામખીયાળી ગામના આદમ બાદરખાન પઠાણ (ઉ.વ.30) નામના શખ્સની આ મોબાઇલ ચોરીમા ધરપકડ કરવામા આવી હતી. પીએસઆઇ પી.એ.જાડેજા અને તેમની ટીમે ચાવંડ નજીકથી આ શખ્સને મોટર સાયકલ પર ઝડપી લીધો હતો. તેની બેગમા જુદાજુદા સાત મોબાઇલ મળી આવ્યા હતા. જે અંગે કોઇ આધાર પુરાવા ન હોય આગવીઢબે પુછપરછ કરતા તેણે આ મોબાઇલ ચોરીના હોવાનુ કબુલ્યુ હતુ.

લાઠી પોલીસના સુત્રોએ જણાવ્યું હતુ કે આ મોબાઇલ તેણે રાજકોટ જિલ્લાના જંગવડ, ખારચીયા તથા વિરનગર તથા ભુજ પંથકમાથી ચોર્યા હતા. આ શખ્સ અગાઉ પણ ચોરીમા ઝડપાઇ ચુકયો છે. તેની પાસેથી સાત મોબાઇલ ઉપરાંત એક મોટર સાયકલ તથા રોકડ રકમ મળી કુલ રૂપિયા 1,44,770નો મુદામાલ કબજે કરવામા આવ્યો હતો.