સહાય:17 મૃતકના પરિવારને 68 લાખની સહાય ચૂકવાઈ

અમરેલી જિલ્લામાં ચોમાસા દરમિયાન આકસ્મિક રીતે મૃત્યુ પામેલ 17 લોકોના પરિવારને સ્ટેટ ડિઝાસ્ટર રિલીફ ફંડમાંથી 68 લાખની સહાય ચૂકવવામાં આવી હતી. ઉપરાંત ભારે વરસાદના કારણે 470 મકાન ધરાશાય થયા હતા. જેના માલિકોને પણ રૂપિયા 1857500ની સહાય પેટે અર્પણ કરાયા હતા.

અમરેલી જિલ્લામાં ઓણસાલ મેઘરાજાએ કહેર વર્તાવ્યો હતો. સમગ્ર સીઝન દરમિયાન જિલ્લાભરમાં 172 ટકા વરસાદ પડ્યો હતો. અહીં ભારે વરસાદના કારણે 470 કાચા અને પાકા મકાન ધરાશાય થયા હતા. જેના કારણે મકાન માલિકોની ઘર વખરી નાશ પામી હતી. ઉપરાંત જિલ્લામાં ચોમાસાની સીઝનમાં નદીમાં તણાઈ જવા અને વીજળી પડવાથી 17 લોકોના મૃત્યુ થયા હતા.

જેના કારણે અમરેલી જિલ્લા ડિઝાસ્ટર વિભાગે સર્વે હાથ ધર્યો હતો. જેમાં ભારે વરસાદના પગલે 17 લોકો આકસ્મિક રીતે અવસાન પામતા તેમના પરિવારને સ્ટેટ ડિઝાસ્ટર રિલીફ ફંડમાંથી 68 લાખ સહાય ચુકવાઈ હતી. તેમજ 470 મકાન માલિકોને રૂપિયા 1857500ને સર્વેના આધારે નાણાં અર્પણ કરાયા હતા.