આહલાદક વાતાવરણ:ગિરિમથક સાપુતારામાં રોશનીના ઝગમગાટથી નિશા ખીલી

ડાંગ જિલ્લો કોરોનામૂક્ત બનતા પ્રવાસીઓ ગિરિમથક સાપુતારામાં વીક એન્ડ માણવા ઉમટી રહ્યાં છે. કોરોના કાળમાં યાત્રિકોના અભાવે ઓક્સિજન પર મુકાઇ ગયેલા પ્રવાસન ઉદ્યોગમાં નવી આશાનો ઉજાશ ફેલાયો છે. હોટલ વ્યવસાય પાટે આવતા હોટલ સંચાલકો પણ સોશિયલ ડિસ્ટન્સ સાથે કોરોનાના નિયમોનું પાલન કરી પ્રવાસીઓને આવકારી રહ્યાં છે. શનિ-રવિ સાપુતારામાં 90 થી 95 ટકા હોટલો ફૂલ હતી. રવિવારે રાત્રે આહલાદક વાતાવરણ વચ્ચે ચોમેર અંધકારને ચીરી રોશનીનો ઝગમગાટ પથરાયો હતો.

સાપુતારામાં પ્રવાસન ઉદ્યોગ પર નભતા અનેક લોકો ફરી પોતાની મૂળ રોજગારી તરફ પાછા ફર્યા છે. સમગ્ર ગુજરાતમાં કોરોનાના પગપેસારાથી લઇ નિયંત્રણમાં આવવા સુધી ડાંગ જિલ્લો કોરોનાથી સૌથી વધુ સુરક્ષિત રહ્યો હોય માત્ર વીક એન્ડમાં જ નહીં પણ રજાના દિવસોમાં પણ દક્ષિણ ગુજરાતના પ્રવાસીઓ માટે સાપુતારા પરિવાર સાથે હરવા ફરવાનું પ્રથમ પસંદગીનું સ્થળ બન્યું છે. અહીં રોપવે, પેરાગ્લાઇડીંગ, હોર્સ રાઇડીંગ, બોટીંગ અને કુદરતી સૌંદર્યનો સમન્વય હોય બાળકો, યુવાનો અને વડીલો ત્રણેયને આકર્ષે છે. }તસવીર : સોમનાથ પવાર