અકસ્માત:ખેતરમાં ડાંગરનાં બે ઢગલાને આગ લાગતા બળીને ખાખ, ડાંગના ભાપખલ ગામે બનેલી ઘટના

ડાંગ જિલ્લાનાં આહવા તાલુકામા ભાપખલ ગામનાં ખેડૂતનાં ખેતરમાં સંગ્રહ કરાયેલા ડાંગરનાં બે ઢગલામાં આગ લાગતા બંને ડાંગરનાં ઢગલા બળીને ખાખ થઈ જતા ખેડૂતને નુકસાની પહોંચી હતી.ડાંગ જિલ્લાનાં આહવા તાલુકાના ભાપખલ ગામે રહેતા ખેડૂત પાંડુભાઈ લહાનુભાઈ સહારેનું ખેતર ઘોડાનામાળ નામની જગ્યાએ આવેલું છે. ખેડૂતે ચોમાસાની ઋતુ દરમિયાન 14 કિલો ડાંગરનું બિયારણ વાવી ડાંગરનાં પાકની ખેતી કરી હતી.

પાકેલ ડાંગરની કાપણી કરી ખેતરમાં જ ખળામાં બે ઢગલામાં મૂકી રાખ્યું હતું, જે ડાંગરનાં ઢગલામાં રાત્રિ દરમિયાન આગ લાગતા સ્થળ ઉપર ડાંગરનાં ઢગલા બળીને ખાખ થઈ જતા ખેડૂતને જંગી નુકસાની થઈ હતી. અહીં ઘટનાસ્થળ પર તાપણુ કરાયેલું નથી તથા વીજ કનેકશન પણ ન હોય જેથી કદાચ કોઈક અજાણ્યા શખસો દ્વારા ઈર્ષા રાખી આગ લગાડાઈ હોવાનું અનુમાન લગાવાય રહ્યું છે. ડાંગરનાં ઢગલામાં આગ આકસ્મિક કે કોઈક દ્વારા લગાડવામાં આવી છે જે કહેવુ મુશ્કેલ બનતા ખેડૂત પાંડુભાઈ સહારેએ આહવા તાલુકા વિકાસ અધિકારી આહવાને જાણ કરી તપાસની સાથે વળતરની માંગણી કરી હતી.